Beıjiń AQSh pen onyń saýda seriktesteri arasynda QHR múddesine nuqsan keltiretin kelisimderge qarsy

ASTANA. KAZINFORM – Bul týraly Qytaıdyń Saýda mınıstrligi Vashıngtonnyń AQSh-tyń baj salyǵyn azaıtýyna aıyrbas retinde basqa elderdiń Beıjińmen saýda qarym-qatynasyn shekteýge kóndirýge daıyndalyp jatqany týraly jaǵdaıǵa túsinik bere otyryp málimdedi, dep habarlaıdy Kazinform menshikti tilshisi.

- Eger mundaı jaǵdaı týyndasa, Qytaı ony qabyldamaıdy jáne tıisti qarsy sharalardy tabandy túrde qabyldaıdy, - dep keltirdi Xinhua Qytaıdyń Saýda mınıstrliginiń málimdemesin.

Málimdemede «basqalardyń múddelerin tarıfterden bosatýǵa aıyrbastaý áreketteri sátsizdikke ushyraıtyny jáne aqyr sońynda barlyq qatysýshy taraptarǵa zııan keltiretini» atap ótildi.

QHR Saýda mınıstrligi óz málimdemesinde Qytaı tarapynyń Qurama Shtattarymen saýda daýlaryn teń konsýltatsııalar arqyly sheshýge tyrysatyn barlyq taraptardy qurmetteıtinin atap ótti.

Bul rette QHR Saýda mınıstrligi barlyq taraptardy adaldyq pen ádilettilik jaǵynda bolýǵa, halyqaralyq ekonomıkalyq jáne saýda erejeleri men kópjaqty saýda júıesin saqtaýǵa shaqyrdy.

- Halyqaralyq saýda djýnglı zańdaryna oralǵan kezde kúshtiler álsizderge jem bolady, barlyq elder zardap shegedi, - delingen málimdemede.

Qytaı barlyq taraptarmen yntymaqtastyq pen úılestirýdi nyǵaıtýǵa, tıisti zańdy quqyqtar men múddelerdi qorǵaýǵa, halyqaralyq ádildik pen ádilettilikti qoldaýǵa daıyn, delingen vedomstvo málimdemesinde.

Osyǵan deıin Qytaıdyń AQSh-tan suıytylǵan tabıǵı gaz satyp alýdy toqtatqany týraly jazdyq.