Beıjiń 2028 jyly birden tórt álem chempıonatyn qabyldaıdy
ASTANA. KAZINFORM — 2028 jyly Beıjiń (Qytaı) mánerlep syrǵanaý, konkımen júgirý sporty, short-trek jáne sınhrondy syrǵanaý boıynsha álem chempıonattaryn qabyldaıdy, dep habarlaıdy UOK baspasóz qyzmeti.
Halyqaralyq konkıshiler odaǵy (ISU) bir qalada birden tórt álem chempıonatyn biriktiretin tarıhı BEIJING28 jobasynyń iske qosylǵanyn jarııalady. Bul sheshim qazirgi ýaqytta Ispanııanyń Tenerıfe qalasynda ótip jatqan ISU Kongresi aıasynda málimdeldi.
Osylaısha, 2028 jyly Beıjiń (Qytaı) mánerlep syrǵanaý, konkımen júgirý sporty, short-trek jáne sınhrondy syrǵanaý boıynsha álem chempıonattaryn qabyldaıdy. Mundaı format ISU tarıhynda alǵash ret júzege asyrylmaq.
Halyqaralyq federatsııanyń málimetinshe, joba sportshylardy, jankúıerlerdi, buqaralyq aqparat quraldarynyń ókilderin jáne seriktesterdi bir aýqymdy sporttyq oqıǵa aıasynda biriktirýge múmkindik beredi.
Jarystar Beıjińdegi olımpıadalyq nysandarda ótedi. Olardyń qatarynda National Indoor Stadium, Capital Indoor Stadium jáne National Speed Skating Oval arenalary bar.
Sporttyq baǵdarlamadan bólek, uıymdastyrýshylar aýqymdy qalalyq festıval ótkizýdi josparlap otyr. Jankúıerler úshin jarystardy tamashalaýǵa arnalǵan arnaıy aımaqtar, fan-aımaqtar, mádenı is-sharalar, sportshylarmen kezdesýler, ınteraktıvti tsıfrlyq belsendilikter, sondaı-aq túrli oıyn-saýyq jáne merekelik baǵdarlamalar uıymdastyrylady.
Sonymen qatar, álem chempıonatynyń jarys baǵdarlamasy aıaqtalǵannan keıin ISU Skating Awards syılyǵyn tabystaý rásimi ótedi.
Aıta keteıik, búgin, 11 maýsymda, fýtboldan 23-shi álem chempıonatynyń shymyldyǵy túriledi. Kazinform tilshisi jankúıerlerdi qandaı qyzyqtar kútip turǵanyn baıandap berdi.
