Beıjińniń mádenıet festıvalinde stýdentter Qazaqstandy tanystyrdy
BEIJІŃ. QazAqparat - Qytaıdaǵy Qazaqstan stýdentteri qaýymdastyǵynyń (KSAC) Beıjińdegi bólimshesiniń belsendileri Halyqaralyq bıznes jáne ekonomıka ýnıversıtetinde ótken mádenıet festıvalinde Qazaqstandy tanystyrdy, dep habarlaıdy «QazAqparat» HAA-nyń Qytaıdaǵy menshikti tilshisi.
Shara barysynda qazaqstandyq 43 stýdent baýyrsaq pisirip, et asyp, tátti dámder ázirledi. Sonymen qatar, belsendiler qazaqy qolóner buıymdaryn, Qazaqstan týraly posterlerdi kelýshilerge pash etti.
Stýdentter ulttyq kıimmen qara jorǵa bıin bılep, «Balbyraýyn» kúıin oryndap, zamanaýı fleshmob kórsetti.
«Kontserttik nómirlerdi Anel Qurmanova, Saltanat Dospanova men Azına Temirova uıymdastyrdy. Rekvızıt jumystaryn Dáýlet Jaqsybek atqardy. Dáýletti dastarhan úshin Tomırıs Mahan bastaǵan qyzdarǵa alǵys aıtamyz. Ártúrli oıyndarmen jáne baıqaýlarmen bizdiń meımandardyń kóńil-kúıin Mádı Igibaeva kóterdi», - dedi «QazAqparat» HAA tilshisine suhbat bergen KSAC Beıjińdegi bólimshesiniń tóraǵasy Nuráli Yrsalıev.
Onyń aıtýynsha, KSAC qolǵa alatyn kelesi shara - Jeńis merekesi bolmaq.
