Beıjińniń eń bıik ǵımaraty ashyldy
ASTANA. Tamyzdyń 31-i. QazAqparat - Beıjińde Álemdik saýda ortalyǵynyń (ÁSO) jer aýmaǵynda qaladaǵy eń bıik ǵımarat bolyp otyrǵan «Qytaılyq álemdik saýda munarasy ІІІ» kópqyzmetti kók tiregen ǵımarat ashyldy. Bul týraly Inhabitat portaly habarlaıdy.
Munaranyń bıiktigi 330 metr. 81 qabatty kók tiregen ǵımaratta qonaq úı, keńseler, meıramhanalar, kommertsııalyq jer aýmaqtary men turǵyn jaılar ornalasady. Ǵımarattyń tómengi tórt qabaty jerasty saýda ortalyǵymen jalǵasqan, onda aspaly qaraǵaı jáne landshafty «sý» baqtary ornalasady.
Skidmore, Owings & Merrill LLP (SOM) sáýlet bıýrosy Arup kompanııasymen birlese jobalaǵan ǵımarat óziniń energııalyq tıimdiligi jaǵynan barlyq qazirgi zaman talaptaryna jaýap berip, LEED Gold «jasyl» sertıfıkatyn ıelenýge úmit artýda. Máselen, munaranyń syrty bólme ishindegi jaryqty retteı alatyn shyny men metall taqtaıshalarmen kómkerilgen. Sonymen qatar, ǵımarat seısmologııalyq jaǵdaıynan da turaqty.
Beıjińdegi álemdik saýda ortalyǵy 1990 jylǵy tamyzdyń 30-ynda ashylǵan edi. «Qytaı álemdik saýda munarasy ІІІ» ashylýy ÁSO damýynyń úshinshi satysynyń aıaqtalýy boldy.
Qazirgi kúni álemdegi eń bıik ǵımarat Birikken Arab Ámirlikterindegi Býrdj Dýbaı (Burj Dubai) munarasy, onyń bıiktigi 818 metrdi (160 qabat) quraıdy.
