Beıjińdi qara tútin basyp tur: 150-den astam reıs toqtatyldy
ASTANA. QazAqparat - Beıjińniń Shoýdý halyqaralyq áýejaıynda qoıý qara tútinnen eń kemi 169 reıs toqtatyldy, dep habarlaıdy TASS.
Áýejaı ákimshiliginiń málimdeýinshe, barlyq jolaýshyǵa ystyq tamaqtar berilip jatyr jáne kestedegi ózgerister týraly der kezinde habarlaý uıymdastyrylǵan.
Qalany tumshalaǵan qalyń tútin - óndiristik kásiporyndardyń shyǵarǵan qaldyǵy. Ásirese, jylytý maýsymynda kómirmen jumys isteıtin elektr stansalary aýaǵa tozańdy kóptep bólýde.
Qazirgi ýaqytta Beıjińde densaýlyqqa qaýipti PM-2,5 (PM 2,5) usaq qatty bólshekter bir tekshe metrge 380 mıkrogramnan asyp ketti. Búkilálemdik densaýlyq saqtaý uıymynyń kelisimine sáıkes, PM-2,5 bólshekteriniń aýadaǵy quramynyń kúndelikti qaýipsiz normasy ár tekshe metrge 25 mıkrogramnan aspaýy tıis.
