Beıjińdegi tabıǵı saıabaqta jolbarys adamdy talap óltirdi
ASTANA. QazAqparat - Beıjiń mańyndaǵy Badalın jabaıy tabıǵat parkiniń kelýshilerine Sibir jolbarysy shapty, jaralanǵan áıel kóp uzamaı mert boldy, dep jazdy «Fachjı vanbao» gazeti.
Oqıǵa senbi kúni bolǵan. Saıabaq aýmaǵynda qydyryp júrgen áıelder avtokólikten shyǵyp, onyń qaýipsizdik erejesin buzǵan. Jaqyn mańda júrgen jolbarys áıelderdi baıqap qalyp, tutqıyldan bas salǵan, dep habarlady RIA Novostı.
Jaraqat alǵan bir áıel oqıǵa ornynda kóz jumdy. Jaǵdaıdy baıqaǵan park qyzmetkerleri kelip, jaralanǵan ekinshi áıeldi aýrýhanaǵa jetkizdi. Park eki kúnge jabylyp, qaıǵyly oqıǵa saldaryn anyqtaý úshin arnaıy komıssııa quryldy.
Basylymnyń jazýynsha, park qyzmetkerleri daýys zoraıtqyshy arqyly kelýshilerge avtokólikten shyǵýǵa qatań tyıym salynatynyn jıi-jıi eskertedi.
Dál osyndaı jaǵdaı parkte 2009 jyly oryn alǵan. Uly Qytaı qorǵanynan óz betterimen túsip, park arqyly jol qysqartqysy kelgen úsh týrıst Sibir jolbarysyna tap keldi. Týrısterdiń biri qaza taýyp, ekeýi aman qaldy.
Beıjiń mańyndaǵy Badalın jabaıy tabıǵat parki uly Qytaı qorǵanynyń tómengi tusynda ornalasqan. Onyń aýmaǵy 400 gektardy alyp jatyr jáne ol - Qytaıdaǵy iri parkterdiń biri. Park aýmaǵynda 10 myńǵa jýyq haıýanat ómir súredi, olardyń arasynda sırek kezdesetin Sibir jolbarystary bar.
