Beıjińdegi saılaý ýchaskesiniń jabylýyna 5 mınýt qalǵanda «Da Gudda Jazz» ánshileri daýys berdi (FOTO)
BEIJІŃ. QazAqparat - Jergilikti ýaqytpen saǵat 20.00 (Astana ýaqytymen saǵat 18.00) Qytaıda QR Parlamenti Májilisiniń saılaýynda daýys berý aıaqtaldy.
Saǵat 19.55-de saılaý ýchaskesine Qazaqstanda belgili «Da Gudda Jazz» hıp-hop tobynyń ánshileri Oljas Nurtazın (Kraım Volshebnık) jáne Artem Korolev (Karabın) keldi.
«Almatyda turamyz, álemdi sharlap júremiz: Reseı, Ýkraına, Qyrǵyzstan, Estonııa, Latvııa, Malaızııada boldyq. Beıjińge úshinshi ret keldik. Bul joly Shanhaıda óner kórsettik, kelesi kúni Beıjińde eki kontsert berdik. Saılaýda daýys berý múmkindiginiń bar ekenin bilip, ony paıdalanýdy sheshtik», - dedi QazAqparatqa bergen suhbatynda.
Eske sala ketsek, «Da Gudda Jazz» ónerine tabynýshylardyń sany 700 myń adamnan asady.
«Jergilikti ýaqytpen saǵat 20.00 bizdiń №207 saılaý ýchaskesi jumysyn aıaqtady. Saılaý komıssııasynyń músheleri daýystardy sanaýǵa kiristi. Nátıje Ortalyq saılaý komıssııasyna jóneltiledi», - dedi qazaqstandyq jýrnalıstterge bergen suhbatynda №207 ýchaskelik saılaý komıssııasynyń tóraǵasy, QHR-daǵy QR Elshiliginiń keńesshisi Manarbek Qabazıev.
Ol saılaýshylar, sonyń ishinde stýdentter daýys berýde belsendilik tanytqanyn atap ótti. 
