Beıjińdegi paradqa qatysqan áskerıler marapattaldy (FOTO)
ASTANA. QazAqparat - Búgin, Astanada QR Qorǵanys mınıstri Imanǵalı Tasmaǵambetov Japonııamen soǵystaǵy qytaı halqy Jeńisiniń 70 jyldyǵy men Ekinshi dúnıejúzilik soǵystaǵy Jeńistiń 70 jyldyǵyna arnalǵan paradqa qatysqan qazaqstandyq áskerı qyzmetshilerdi marapattady.
Bul týraly qorǵanys vedomostvosynyń baspasóz qyzmeitnen habarlady.
«Sizderge QR QK Joǵarǵy Bas Qolbasshysynyń atynan alǵys bildirgim keledi. Júktelgen mindetterdi abyroımen atqardyńyzdar, biz Sizderdi maqtan tutamyz. Barsha Qazaqstan halqy osy paradty tamashalady jáne elimizdiń Qarýly Kúshterin maqtan etti. Osynaý paradqa qatysýdyń mańyzy erekshe. Óıtkeni, Qytaı taıaý kórshimiz retinde eki el arasynda myǵym dostyq qarym-qatynas ornaǵan. Paradqa qatysý arqyly sizder úlken tájirıbe jınaqtadyńyzdar», - dedi QR Qorǵanys mınıstri Imanǵalı Tasmaǵambetov. Qazaqstandyq áskerlerdiń atynan osynaý aýqymdy paradqa QR Qorǵanys mınıstrliginiń qurmet qaraýyly rotasy qatysty. Anaǵurlym erekshe kózge túsken segiz áskerı qyzmetshi QR Qorǵanys mınıstriniń qolynan «Halyqaralyq yntymaqtastyqty damytýǵa qosqan úles úshin» medalin aldy. «Biz Beıjińde ótetin sherýge bir aıǵa jýyq Astanada jáne 10 kúndeı Qytaıda daıyndaldyq. Mundaı aýqymdy is-sharada búkil álem aldynda elimizdi, Qarýly Kúshterimizdi kórsetý biz úshin úlken maqtanysh. Bizge áskerimizdi, saptyq daǵdymyzdy joǵary deńgeıde kórsetýimiz qajet edi. Joǵarǵy Bas Qolbasshy, elimizdiń Qorǵanys mınıstri, álemdik derjavalardyń kóshbasshylary aldynda biz laıyqty deńgeıde adymdap óttik dep oılaımyn», - dedi QR QM qurmet qaraýyly rotasynyń komandıri Maqsat Baıjigitov. Paradqa 17 eldiń áskerı qyzmetshileri qatysty. Qazaqstannyń Qarýly Kúshterinen 76 áskerı qyzmetshi qatysty. «Men aldymen tý ustaýshy toptyń quramynda sol jaqtaǵy assıstent bolyp kele jattym. Beıjińdegi aptap ystyq jattyǵý jasaýǵa belgili bir qıyndyqtar týǵyzdy. Astanada jattyǵý júrgizý áldeqaıda yńǵaıly boldy. Alaıda, buǵan qaramastan, Joǵarǵy Bas Qolbasshymyzdyń bergen joǵary baǵasy jáne Qorǵanys mınıstriniń qurmet qaraýyly rotasyn marapattaýy bizdiń tıisti deńgeıde adymdap ótkenimizdi jáne búkil álemge áskerimizdi pash etkenimizdiń aıǵaǵy bolyp tabylady. Qazir biz ózimizdiń tikeleı qyzmettik mindetterimizge, ıaǵnı, Otanymyzdy qorǵap, saptyq mashyǵymyzdy arttyrýǵa kirisýdemiz», -dedi Beıjińdegi paradqa qatysqan QR QM QQR vzvod komandıri aǵa leıtenant ıAlkýnjan Chýgarov. Qurmet qaraýyly rotasyna elimizdiń Qarýly Kúshterin kórsetýge mashyqtanǵan 22 men 28 jas aralyǵyndaǵy qazaqstandyq armııanyń úlgili áskerı qyzmetshileri iriktelip alynǵanyn esterińizge sala keteıik.
