Beıjińdegi Olımpıadada dopıngke qarsy jańa ádis qoldanylady

BEIJІŃ. QazAqparat – «Qurǵaq qan» taldaýyna negizdelgen sportshylardy dopıngke tekserýdyń jańa ádisi alǵash ret resmı jáne tolyq kólemde Beıjińdegi Qysqy Olımpıada oıyndarynda qoldanylady. Bul týraly sársenbi kúni Dúnıejúzilik antıdopıng agenttiginiń (WADA) basshysy Vıtold Banka baspasóz máslıhatynda málim etti, dep habarlaıdy QazAqparattyń Qytaıdaǵy menshikti tilshisi.

Onyń aıtýynsha, Beıjińdegi Qysqy olımpıada oıyndarynda qurǵaq qan daqtaryna testileýdiń jańa ádisin engizý dopıngke qarsy qozǵalystyń damýyndaǵy mańyzdy oqıǵa. Ol dástúrli synama alý ádisine qaraǵanda birqatar artyqshylyqtarǵa ıe.

WADA ókilderi «qurǵaq qan» ádisi bıomaterıaldy jınaý jáne tasymaldaý protsedýrasyn jeńildetedi, sonymen qatar sportshylardyń denesine ádettegi synama alý ádisterine qaraǵanda azyraq aralasady dep sanaıdy.
Tájirıbe retinde Tokıodaǵy Jazǵy olımpıada kezinde «qurǵaq qan» alý ádisi qoldanyldy. Qurǵaq qan daqtaryna arnalǵan testileý ádisin Dúnıejúzilik antıdopıng agenttigi Halyqaralyq Olımpıada komıtetimen (HOK) jáne AQSh, QHR, Japonııa, Shveıtsarııa jáne Aýstralııanyń Ulttyq dopıngke qarsy uıymdarymen birlesip ázirledi.
Beıjińdegi XXIV qysqy Olımpıada oıyndary 4-20 aqpan aralyǵynda ótedi.