Beıjińdegi qysqy Olımpıadada Qazaqstan týyn alǵash ret eki sportshy alyp shyǵady
NUR-SULTAN. QazAqparat - Beıjińdegi XXIV qysqy Olımpıada oıyndarynyń bastalýyna búgin týra 3 kún qaldy, dep habarlaıdy QazAqparat tilshi.
Olımpıada oıyndarynyń bastalýy jaqyndaǵan saıyn onda jarysqa daıyndyq ta qyza tústi. Qazaqstandyq atletter de Beıjiń, ıAntsın jáne Chjantszıakoý qalalaryndaǵy olımpıadalyq qalashyqtarǵa tolyǵymen ornalasyp, belgilengen kestege saı jarysqa sońǵy jattyǵýlaryn pysyqtap jatyr.
Beıjiń tórt jylda bir oralatyn álemniń basty sport toıyn ózgeshe ótkizýge barynsha kúsh salýda.
Búgin, qytaı kúntizbesi boıynsha 1 aqpan. Bul data ol elde jańa jyl merekesi sanalady. Osyǵan oraı, Olımpıadany uıymdastyrý komıteti álemniń ár túkpirinen kelgen atletter men bapkerler qaýymyna syılyqtar úlestirýdi de josparlap qoıǵandaryn jetkizdi.
Qytaı astanasyndaǵy «Ulttyq stadıonda» ótetin jahandyq jarystyń resmı ashylý saltanatyn da buryn-sońdy bolmaǵan erekshe qoıylymdarmen el esinde qaldyrmaq nıette. Osydan bir kún buryn aýqymdy daıyndyq jumystary ótip, otshashýlardy synaqtan ótkizdi.
Belgili bolǵandaı, ashylý saltanaty ekologııa men ınnovatsııa taqyryptaryna arnalmaq. Al shoý 100 mınýtqa sozylady. Oǵan basty sebep - kovıt indetiniń taralýyna jol bermeý.
Búginde qytaı astanasynda koronavırýs juqtyrý derekteri kúrt kóbeıip ketken. Sol sebepti jergilikti bılik dereý shara qabyldap, qalanyń keı aýdandary lokdaýnǵa jabylatynyn jarııa etti.
Sondaı-aq, uıymdastyrýshy komıtet vırýs juqtyrǵandardyń arasynda Olımpıadaǵa qatysýshylar da bar ekenin aıtty. Búginge deıin 170-ten astam KOVID juqtyrý deregi anyqtalǵan. Onyń 51-i — sportshylar. Qazir olardyń bári karantınge alynǵan. Eń bastysy - ázirge qazaqstandyq atletter arasynda ondaı derekter tirkelgen joq.
Esterińizge sala keteıik, XXIV qysqy Olımpıada oıyndaryna Qazaqstan quramasynan barlyǵy 34 sportshy qatysady, olar 87 joldama jeńip aldy.
Búginde olar olımpıadalyq qalashyqtarǵa ornalasty. Qazaqstandyqtar shańǵy jarysy, frıstaıl, akrobatıka jáne mogýl, konkımen júgirý, short-trek, bıatlon, taý shańǵysy, tuǵyrdan sekirý, shańǵy qossaıysy sııaqty 8 sport túrinen synǵa túsedi.
Oıyndardy «Qazaqstan», «Qazsport», «Habar» jáne «El arna» telearnalarynan tikeleı efırden kórýge bolady. Tórtjyldyq dodanyń ashylý saltanaty Nur-Sultan ýaqytymen 4 aqpan kúni, saǵat 17:55-te bastalady.
Olımpıadanyń saltanatty ashylý rásiminde elimizdiń baıraǵyn eki sportshy alyp shyǵady. Bul — qysqy sport túrlerinen Olımpıadada el baıraǵyn alǵash ret eki sportshymyzdyń kóterýi. Onyń biri - short-trekten Qazaqstan quramasynyń kóshbasshysy Abzal Ájiǵalıev bolsa, ekinshisi - konkıshi Ekaterına Aıdova. Eki sportshymyz da quramadaǵy tájirıbeli, júldege talasýǵa múmkindigi joǵary sportshylar.
