Beıjińdegi qazaqstandyq balalardy damytý ortalyǵynda Tuńǵysh Prezıdent kúni atap ótildi
BEIJІŃ. QazAqparat - Búgin Beıjiń qalasyndaǵy «Baldyrǵan» balalardy damytý ortalyǵynda Qazaqstan Respýblıkasynyń Tuńǵysh Prezıdenti kúnine oraı arnaıy shara bolyp ótti, dep habarlaıdy «QazAqparat» HAA-nyń Qytaıdaǵy tilshisi.
Balalar QR Ánuranyn oryndap, Qazaqstannyń Qytaı Halyq Respýblıkasyndaǵy Elshisiniń zaıyby Álııa Nurysheva jáne balalardy damytý ortalyǵynyń jetekshisi, psıholog-pedagog Nazgúl Nazarbekovanyń quttyqtaý sózderinen keıin qonaqtarǵa merekelik kontsert usynyldy. Balalar Otan týraly taqpaqtaryn aıtyp, qazaq ulttyq bılerin bıledi, «Atameken» ánin shyrqady.
Beıjińde júrgen Ulttyq akademııalyq kitaphananyń delegatsııasy «Baldyrǵanǵa» syılyq retinde qazaqstandyq avtorlardyń 12 kitabyn tartý etti. Qonaqtar balalar ortalyǵynyń «Qazaqstan balalar kózimen» atty sýret kórmesimen tanysty.
Qazirgi kezde «Baldyrǵanda» 20 tárbıelenýshi bar, sonyń ishinde tek qazaqstandyqtar ǵana emes, Qyrǵyzstan, Úndistan jáne Pákistan elderiniń de balalary bar.
Eske sala keteıik, 2018 jyldyń 23 sáýirinde Beıjińde Qazaqstan Respýblıkasynyń Qytaı Halyq Respýblıkasyndaǵy Elshiliginiń qoldaýymen ashylǵan «Baldyrǵan» ortalyǵy shetelde qazaq tilin oqytatyn alǵashqy balalardy damytý ortalyǵy boldy. Onyń ashylý saltanatyna QR Syrtqy ister mınıstri Qaırat Ábdirahmanov qatysty.
