Beıjińde jer silkindi

BEIJІŃ. QazAqparat – Qytaı astanasy Beıjiń qalasynda magnıtýdasy 2,7 baldyq jer silkinisi boldy. Bul týraly QazAqparat Qytaı seısmologııalyq ortalyǵyna silteme jasap habarlaıdy.

Jerasty dúmpýler 3 aqpan kúni jergilikti ýaqytpen saǵat 01:55-te Beıjińnen soltústik-shyǵysqa qaraı ornalasqan Chaoıan aýdanynda tirkelgen. Onyń oshaǵy qysqy Oıyndar rásimi ótetin «Qus uıasy» ulttyq stadıonynan shyǵysqa qaraı 11-15 shaqyrym jerde boldy.

Jer silkinisiniń oshaǵy 21 shaqyrym tereńdikte ornalasty. Qytaı astanasynyń bul aýdanynda 3,45 mln astam halyq turady.

Qytaı BAQ habarlaýynsha, astanalyq Chaoıan aýdanynda úıleri jer silkinisi oshaǵyna jaqyn ornalasqan turǵyndar jerasty dúmpýlerdi sezingen.

Zardap shekkender men qaza tapqandar týraly málimet kelip túsken joq.

Beıjiń qalasynda XXIV qysqy Olımpıada oıyndary 2022 jyldyń 4-20 aqpan kúnderi, al Paralımpıada oıyndary – 4-13 naýryz aralyǵynda ótedi.