Beıjińde zańsyz jerasty bólmelerin anyqtaý úshin radar qoldanylady
BEIJІŃ. QazAqparat - Aspanasty eliniń astanasynda zańsyz jerasty bólmelerin anyqtaý úshin radar qurylǵysy qoldanylatyn bolady. Bul týraly qalalyq úkimetke silteme jasap Qytaı aqparattyq ınternet ortalyǵy habarlady.
Beıjińde zańsyz jerasty qurylystary problemasy ásirese qańtar aıynyń sońynda erekshe ótkir qoıyldy. Óıtkeni astananyń Sıchen aýdany turǵyndarynyń biri ókimet oryndarynyń ruqsatynsyz óz úıiniń aýlasynda tereńdigi 18 metrlik ura qazǵan, bul tórt kórshi úıdiń opyrylýyna jáne oǵan jalǵas jatqan joldyń boıynda úlken qazanshuńqyrdyń paıda bolýyna ákep soqty.
BAQ úı ıesiniń kim ekenin jarııalaǵannan keıin janjal jurtshylyqtyń nazaryn aýdardy. Ol shyǵys-qytaılyq Tszıansý provıntsııasyndaǵy Sıýıchýan qalasynyń zań shyǵarýshysy, halyq ókilderi qalalyq jınalysynyń múshesi Lı Baotszıýn bolyp shyqty.
Osy oqıǵadan keıin qala ókimet oryndary zańsyz jerasty bólmelerin anyqtaý úshin arnaıy top qurdy. Inspektsııalyq top quramyndaǵy tehnık radardyń kómegimen jerasty bólmeleriniń tereńdigin, olardyń shamamen alǵandaǵy aýdandaryn jáne ornalasýyn anyqtaı alady. Eger radar málimetteri rastalsa, úı ıesi tıisti belgilengen merzim ishinde jerasty qýystaryn betonmen nemese basqalaı materıaldarmen toltyryp, zańsyz jerasty bólmesin joıýy tıis.
