Beıjińde Úısin tarıhyn arqaý etken spektakl qoıyldy
ASTANA. QazAqparat - QHR Іle qazaq avtonomııaly oblysynyń Tekes aýdanynyń ártisteri daıyndaǵan «Qara kóz» atty mýzykalyq spektakl Beıjińde qoıyldy, dep habarlaıdy QazAqparat kazakcnr.com saıtyna silteme jasap.
60 ártis oınaǵan «Qara kóz» atty bul kólemdi tarıhı qoıylym, 2000 jyl burynǵy Úısin elindegi tarıhı oqıǵany arqaý etken. Sonymen birge tarıhı-mádenı muralarǵa baı «Segiz qyrly qala» atanǵan kórikti Tekesti, osy aýdan aýmaǵyndaǵy Dúnıejúzilik mádenı muralar qataryna engizilgen Tekestiń ataqty Qarajon jaılaýynda ómir súrgen Úısin eliniń syrtqy memlekettermen aradaǵy qarym-qatynasy ózek bolǵan.
Osylaısha ulttyq tús alǵan, óńirdiń ótkeni men búginin sahnaǵa shyǵarǵan «Qara kóz» Beıjińdegi kórermenderdiń yqylasyna bólendi. Tarıhı-mádenı qundylyǵymen erekshelengen týyndy aldaǵy ýaqyttarda osy qalada taǵy da 5 ret qoıylmaq. Sondaı-aq, Qytaıdyń basqa da ishki qalalarynda kórsetý josparlanyp otyr.
Qytaıdiń Shyńjań ólkesindegi Tekes aýdanynyń dúnıe júzindegi eń úlken, eń kemeldi bagýa (qazaqsha: Segiz qyrly) qalashyq degen ataǵy bar. 2001 jyly Gınnestiń rekordtar kitabyna engen. Aýdan ortalyǵy geometrııalyq segiz qyrlylyǵymen de áıgili, jalpy sáýleti dóńes formasynda kelip, kóshe joldarynyń ornalasý ereksheligi orda tárizdi, joldary órmekshiniń toryndaı tutasyp jatady. Sonymen qatar, ulttyq ereksheligi, tarıhı mádenıeti, tabıǵı kórinisteri, shyǵystyq sáýlet úlgisiniń arqasynda Qytaı týrızminde ózindik orny bar óńirge aınaldy. Bul aımaq ejelgi Úısin mádenıeti men salt-dástúri, ulttyq qundylyqtary toǵysqan jer.
Aıta keter jaıt, Іle qazaq avtonomııaly oblysy qaraýyndaǵy osy aýdanda qazaqtar jıi shoǵyrlanǵan. 
