Beıjińde «Túrkologııa jáne qazaq tili men ádebıeti» atty ǵylymı-zertteý jınalysy ótti
ASTANA. Jeltoqsannyń 1-i. QazAqparat /Baqytjol Kákesh/ - 3 kún boıy jalǵasatyn «Túrkologııa jáne qazaq tili men ádebıeti-2009» atty zertteý ǵylymı jınalysy qarashanyń 28-i kúni Qytaı astanasy Beıjińdegi Ulttar ýnıversıteti qazaq fılologııa fakýltetiniń jıyn zalynda saltanatpen ashyldy,
dep habarlaıdy QazAqparat Qytaıdaǵy «Qazaq sahara» (kzsahara.cn) saıtyna silteme jasap.
Bul basqosý Beıjiń Ulttar ýnıversıteti qazaq fılologııa fakýlteti qurylǵandyǵynyń 5 jyldyǵyn atap ótý jáne osy joǵary oqý orny qazaq fılologııa fakýltetiniń professory, Germanııa «Hambolt» qor qoǵamynyń «Álemdik tanymal ǵalym» degen marapattaýyna ıe bolǵan, halyqaralyq altaı tilderin zertteý keńesiniń altyn medalyn enshilegen, Túrkııa til ǵylymy Akademııasynyń qurmetti Akademıgi Giń Shymın myrzanyń 80 jasqa tolǵan mereı toıyna da oraılastyrylyp ótkizilip otyr.
2004 jyly sáýirdiń 15-i kúni Beıjiń Ulttar ýnıversıteti janynan qazaq fılologııa fakýlteti jeke shańyraq kótergen bolatyn. Al qazaq tili men ádebıetin zertteý mamandyǵy 1953 jyly qurylǵan, osy sala boıynsha 1979 jyldan bastap magıstrlik, 1993 jyldan bastap doktorlyq ǵylymı ataqtaryn qorǵaý dárejesine ıe bolǵan. Bul qazirge deıingi shetel astanasynda oryn tepken álemdegi jalǵyz qazaq tildi fakýltet.
Atalmysh jıynǵa memlekettik ulttyq ister komıteti, Qytaı qoǵamdyq ǵylym akademııasy, Shynjań til-jazý komıteti, Shynjań ýnıversıteti, Shynjań gazeti, «Shuǵyla» jýrnaly, «Mura» jýrnaly, Beıjińdegi «Halyq» radıosy, «Ulttar» baspasy qatarly oryndardan kelgen ǵalymdar men jýrnalısterden quralǵan 100 den astam adam qatysty.
Sondaı-aq Qazaqstan, Germanııa sııaqty memleketterden kelgen túrkologııa salasynyń mamandary da arnaıy jınalysqa shaqyrylǵan eken. Sharany Qazaq fılologııa fakýlteti partııa hatshysy Muqtar Ábilqaquly basqaryp ashty. Osy 3 kúnde 50-den astam zertteýler talqyǵa salynady. Jıynda Qazaqstan memlekettik til ǵylymy ınstıtýty, halyqaralyq qazaq tili qoǵamy qatarly uıymdardyń quttyqtaý jedelhattary oqyldy.
