Beıjińde tuńǵysh jeke dombyra kýrsy ashyldy - VIDEO

Naǵyz qazaq qazaq emes, naǵyz qazaq - dombyra. Dombyra búginde kúlli álemge tanymal. Eki ishektiń kómegimen-aq bar qazaqtyń mádenıetin, turmys-tirshiligin jahanǵa jyrlady. Qazaqtyń qara dombyrasy álemniń eń úlken, bedeldi, syıly sahnalarynan kórindi. Asyl aspabymyz búginde qazaqtyń eń úlken maqtanyshy bolyp tabylady. Ózge elde dombyrany dáriptep júrgen qandastarymyzdyń aıtýynsha, sheteldikter arasynda dombyraǵa qyzyǵýshylar sany jyldan-jylǵa artyp keledi. Ásirese kórshiles qytaılyqtar ulttyq aspabymyzdy úırenýge erekshe qushtarlyq tanytýda deıdi.

Beıjińde jýyrda tuńǵysh jeke dombyra kýrsy ashyldy. Munda Mural esimdi qandasymyz dáris ótkizedi. Mural byltyr Ortalyq ulttar ýnıversıtetin mýzyka mamandyǵy boıynsha támamdaǵan. Qazir dombyra úıretip, nápaqasyn taýyp júr. Mundaǵy bas maqsat - paıda tabý emes, ulttyq ónerdi dáripteý. Qazaqtyń qara dombyrasyn qalyń jurtqa moıyndatsam degen armany bar. Ol úshin dombyra erekshe orynda.

Muraldyń dárisi aptasyna 2 saǵattan 3 ret ótedi. Úsh toby bar. Bireýinde - tek qazaq balalary, bireýi - aralas, endi bireýinde - tek qytaılar. Jalpy alǵanda 40-50 shákirti bar. Shákirtteriniń ishinde asyl aspabymyzǵa erekshe qyzyǵýshylyqpen qarap, bar yntasyn salyp úırenetinder qytaılar eken. Olar ózderine tańsyq aspapqa ári tań qalady ári tamsanady.

«Dombyrany alǵash ýnıversıtetke, mýzyka mamandyǵyna synaq tapsyrǵaly kelgende kórdim. Menimen birge synaqqa kelgen qazaq stýdentteri dyńǵyrlatyp otyr eken. Olardan bir melodııa oınap berýin ótindim. Uıyp tyńdadym. Nebári eki ishekten sonsha áýen qalaı shyǵady eken dep tań qalǵanmyn. Sol sátten bastap, bul ǵajap aspapqa qyzyǵýshylyǵym týdy», - deıdi jergilikti turǵyn Van Chjoýlı.

«Bulardyń mádenıetimen bizdiń mádenıet uqsamaıdy. Sondyqtan olar kóshpendi halyq mádenıetine qyzyǵady. Qytaıdy bizdiń jaılaýǵa aparsań, atqa mingisi keledi ǵoı. Sol sekildi dombyraǵa da qatty qyzyǵady», - deıdi Mural Bımuratuly.

Mural kásibiniń paıdasy ushan-teńiz emes, biraq nan tabýǵa jetetinin aıtady. Jyraqta júrgen qandasqa dombyra tán azyǵynan kóri, jan azyǵyn molynan beredi. Qasıetti aspabymyz álemge tanylyp, qazaqtyń abyroıy asqaqtasa boldy, erkektiń qolyna bir kúrek qashan da tabylady deıdi qandasymyz.