Beıjińde Transkaspıı dálizindegi Qazaqstannyń róli týraly aıtyldy
BEIJІŃ. QazAqparat - Investıtsııalar jáne damý vıtse-mıınıstri Roman Sklıar bastaǵan qazaqstandyq delegatsııa «Bir beldeý, bir jol» bastamasyn iske asyrýdaǵy Transkaspıı saýda jáne tranzıt dáliziniń róli» halyqaralyq konferentsııasyna qatysty, dep habarlaıdy «QazAqparat» HAA Qytaıdaǵy menshikti tilshisi.
Transkaspıı halyqaralyq kólik marshrýty (THKM) - Qytaı, Qazaqstan Kaspıı akvatorııasy arqyly Ázerbaıjan, Grýzııa odan ary Eýropa elderine shyǵatyn halyqaralyq kólik dálizi.
R.Sklıar konferentsııanyń ashylýynda Qazaqstannyń kólik-tranzıttik áleýeti týraly baıandady. Onyń aıtýynsha, sońǵy 10 jyldyń kóleminde QR kólik salasyna 30 mlrd dollar ınvestıtsııa quıylyp, 2,5 myń shaqyrym temir jol salynyp, 19,5 myń shaqyrym avtojol qaıta jóndeýden ótken. Kaspıı teńizindegi Qazaqstan porttarynyń ótkizý múmkindigi 23,5 mln tonnaǵa deıin ulǵaıyp, 15 áýejaıdyń ushyryp-qondyrý jolaqtary jańǵyrtylǵan.
Jıynda «QTJ» UQ» AQ vıtse-prezıdenti Sanjar Elýbaev sóz sóıledi.
Onyń aıtýynsha, mamandar Transkaspıı baǵyty men Shyǵys jáne Ońtústik Eýropadaǵy taýar aınalymy 2020 jylǵa qaraı 922 mlrd dollarǵa deıin ósetini týraly baǵa bergen. Júk kóleminiń áleýetimen eseptesek, bul 20 fýttyq ólshemdegi 300 myńnan astam konteıner degen sóz.
