Beıjińde teńiz juldyzy pishindes álemdegi eń úlken áýejaı ashyldy
BEIJІŃ. QazAqparat – Beıjińde jańa Dasın halyqaralyq áýejaıy ashyldy. Ol tanymal ırak-brıtandyq sáýletshi Zahı Hadıdtiń jobasy boıynsha salyndy. Bul – álemdegi eń iri áýejaı. Aýmaǵy – 700 myń sharshy metrdi quraıdy, dep habarlaıdy QazAqparat BBC-ge silteme jasap.
Jalpy shyǵyny 11 mlrd dollardy quraǵan áýejaı resmı túrde sársenbi kúni, Qytaı Halyq Respýblıkasynyń 70 jyldyǵyna birneshe kún qalǵanda ashyldy. Ashylý saltanatyna QHR kóshbasshysy Sı Tszınpın qatysty.
Halyqaralyq áýejaılar keńesiniń málimetinshe, Dansı Atlanta áýejaıynan keıingi adamdardyń kóp kelýi jóninen ekinshi áýejaı bolmaq.
«Qytaı bıligi jańa áýejaı Beıjiń elordalyq halyqaralyq áýejaıynyń jumysyn jeńildetý úshin qajet ekenin aıtady. Ol jylyna 130 mln jolaýshyny qabyldaı alady dep kútilýde» , dep jazady Qytaıdyń Global Times basylymy.
Dasınniń tórt ushyp-qoný jolaǵy jáne 150 ushaqqa arnalǵan turaq orny bar. Ol 116 baǵyt boıynsha reıs jasaıdy. Onyń 101-i – ishki, 15-i – halyqaralyq reıster.
Ashylǵan kúni jańa áýejaıdan 7 áýe kompanııasy reıs jasamaq. China Southern Airlines áýe kompanııasynyń alǵashqy reısi áýejaıdan jergilikti ýaqyt boıynsha 16:23-te ushty.
Keıbir halyqaralyq áýe kompanııalary, sonyń ishinde British Airways, Dasınge reısterdiń ushatyny týraly habarlap úlgerdi.
Global Times atap ketkendeı, jolaýshylar qaýipsizdik tekserisi kezinde qandaı da bir qujattar nemese otyrǵyzý talonyn kórsetip áýre bolmaıdy, sebebi áýejaı adamdy taný júıesimen jabdyqtalǵan.
