Beıjińde «ShYU úlgisi» ınteraktıvti oıyny ótti
BEIJІŃ. QazAqparat - 27 sáýir kúni Shanhaı Yntymaqtastyq Uıymy Hatshylyǵynyń «Astana» zalynda dástúrli «ShYU úlgisi» ınteraktıvti oıyny ótti, dep habarlaıdy QazAqparattyń Qytaıdaǵy menshikti tilshisi.
Saıysqa ShYU múshe memleketterdiń azamattary, QHR, Reseı elshiligi janyndaǵy orta mekteptiń joǵary synyp oqýshylary qatysty.
Bir jarym saǵat ishinde balalar ShYU múshe memleketterdiń Ulttyq úılestirýshileri otyrysynyń jumysyn úılestirdi, aımaqtaǵy beıbitshilik pen turaqty damýdy qamtamasyz etýdegi ózara árekettestik baǵyttaryn talqylady, kópjaqty ytnymaqtastyqty damytý boıynsha usynystar jasady. Bul oıyn Uıymdaǵy mańyzdy shara - 9-10 maýsym kúnderi Tsındao qalasynda ótetin ShYU sammıtine arnalyp otyr.
«Sońǵy eki aı boıy «ShYU úlgisi» oıynyna daıyndaldyq, ózekti halyqaralyq máselelerdi talqylap, olardyń sheshimin taptyq. Bul oıyn bolashaqta mamandyq tańdaýymyzǵa da septigin tıgizedi», - dedi qazaqstandyq oqýshy Jánııa Qadyrova QazAqparat tilshisine bergen suhbatynda.
Oıyn sońynda ShYU Bas hatshysy Rashıd Alımov jas dıplomattardyń pikirtalasynyń qyzyqty ótkenin atap ótti.
«ShYU úlgisi» bizdiń ortaq dástúrimizge aınaldy. Osynyń mysalynda «Shanhaı rýhy» ustanymynda bizdiń izimizdi basatyn dıplomattardyń ósip kele jatqanyn kórdik. Biz halyqaralyq qarym-qatynastar júıesinde túbegeıli ózgerister bolyp jatqan kezeńde ómir súrip jatyrmyz. Bul jaǵdaıda ShYU múshe memleketter parasatty jáne salmaqty saıasat júrgizip keledi», - dedi ol.
Interaktıvti oıynǵa belsendi qatysqan balalar Alǵys hattarmen jáne baǵaly syılyqtarmen marapattaldy.
