Beıjińde ótetin qysqy Olımpıada oıyndarynyń logotıpi jarııalandy

  ASTANA. QazAqparat - 2022 jyly Beıjiń qysqy Olımpıada uıymdastyrý komıteti 15 jeltoqsan kúni XXIV qysqy Olımpıada jáne XIII Paralımpıada oıyndarynyń logotıpin jarııady, dep habarlaıdy QazAqparat.

Beıjiń qalasyndaǵy Ulttyq sý sporty olımpıada ortalyǵynda ótkizilgen sharaǵa Halyqaralyq olımpıada komıtetiniń (HOK) prezıdenti Tomas Bah, QHR Memlekettik keńesiniń orynbasar premeri Chjan Gaolı, Beıjiń qalasy ákimi jáne Beıjiń qysqy Olımpıada uıymdastyrý komıteti tóraǵasy Tsaı Tsı qatysty.
 

Sınhýa aqparat agenttigininiń habarlaýynsha, XXIV qysqy Olımpıada oıyndary logotıpi qytaıdyń «Qys» (冬) degen ıeroglıfine uqsatylyp «qysqy arman» dep ataldy. Al XIII Paralımpıada oıyndary logotıpi qytaıdyń «Ushý» (飞) árpi negizinde jobalanyp, «Samǵaý» dep ataldy.


 

Aıta keteıik, Beıjiń qalasy 2015 jylǵy Halyqaralyq Olımpıada komıtetiniń 128 sessııasynda 44 daýys jınap XXIV qysqy Olımpıada jáne XIII Paralımpıada oıyndaryn ótkizý mártebesin jeńip aldy.