Beıjińde Naýryz meıramyna jáne Shanhaı yntymaqtastyǵy uıymynyń 10 jyldyǵyna arnalǵan halyqaralyq fýtbol týrnıri ótti

Senbi kúni uıymdastyrylǵan jarysqa Qazaqstan, Qyrǵyzstan, Reseı,Tájikstan, Ózbekstan elshilikteriniń, Qytaı Syrtqy ister mınıstrliginiń, Shanhaı yntymaqtastyǵy uıymy Hatshylyǵynyń komandalary, sondaı-aq Qytaıda tirkelgen TMD elderiniń qurama komandasy qatysty.

Týrnırdiń ashylýy rásiminde sóz sóılegen Qazaqstan elshisi Ikram Adyrbekov jınalǵan qaýymǵa osynaý sporttyq merekeni ótkizý bastamasyna kórsetken qoldaýlary úshin alǵys bildirdi jáne jeńis tiledi.

Qyzý tartystyń nátıjesinde birinshi oryndy TMD elderiniń qurama komandasy jeńip aldy. Al ekinshi jáne úshinshi oryndar sáıkesinshe, ShYU Hatshylyǵy men Qazaqstan elshiliginiń komandalaryna buıyrdy. Týrnırdi Qazaqstannyń Qytaıdaǵy Elshiligi Qazaqstannyń Shanhaı yntymaqtastyǵy uıymyndaǵy tóraǵalyǵynyń aıasynda uıymdastyrdy.