Beıjińde Naýryz meıramyn toılap kele jatqanymyzǵa 40 jyldaı ýaqyt boldy - Balapan Rabatov
«Ulys kúni qazaq jurty úshin árqashan qasıetti, kıeli sanalǵan. Qytaı elinde turatyn qazaqtar da Naýryzdy jyl basy retinde erekshe atap ótedi. Naýryz kúni árbir shańyraqta úlken shattyq ornaıdy. Naýryz merekesine Beıjińde turatyn qandastardyń yqylasy ótken ǵasyrdyń 80-jyldary oıandy desem qatelespeıtin shyǵarmyn. A.Majıt, E.Ábilqasym, M. Ábilqaq, J.Saǵat qatarly aǵabýyn ókilderi bas bop, ata dástúrine saı jeti dámnen kóje jasap, kádimgideı merekelik qımyl ótken-di. Sodan beri Beıjińde Naýryz meıramyn toılap kele jatqanymyzǵa da 40 jyldaı ýaqyt bolypty. Sońǵy jyldary Naýryz toıyna arnalǵan merekelik shara arnaýly óner ujymdaryn shaqyrý, kontserttik baǵdarlama daıyndaý, telearnalarǵa túsirip taratý syndy aýqymdy órege kóterildi. Árıne, Qytaı elindegi bul merekeniń úlkeni ShUAÓ-de, Úrimji, Qulja, Altaı, Tarbaǵataı, Barkól, Aqsaı qatarly qazaqtar jıi qonystanǵan ortalyq qalalarda, avtonomııalyq oblys, aımaqtarda, aýdan, aýyldarda asa joǵary deńgeıde toılanady. Ulttyq tele-radıo arnalary, baspasóz qyzmeti túgel merekelik kórsetilim, radıohabar, arnaýly bet daıyndaıdy. Naýryz merekesi de memlekettik mańyzǵa ıe, úsh kún demalys berilgen.
Tól merekemizdiń jańa urpaqtyń sana-sezimine ulttyq qundylyqtardy sińirýdegi óskeleń rólin baǵalaǵan abzal. Naýryz eshkimniń mindetteýinsiz ár qazaqqa maqtanysh bolatyn, úkili úmiti men arman-tilegine ushtasqan, árkimniń júreginen, ishki saraıynan oryn alǵan shynaıy merekege aınalýy tıis. Alda kele jatqan Ulystyń uly kúnimen Alash jurtyn, Qazaqstan dep atalatyn baıtaq eldiń halqyn shyn júrekten quttyqtaımyn. Jańa jyldyń basy árbir januıaǵa qut-bereke ákelsin!», deıdi aqyn Balapan Rabatov.
