Beıjińde Qytaı men Frantsııa basshylary kelissóz ótkizdi

ASTANA. QazAqparat – QHR Tóraǵasy Sı Tszınpın Frantsııa Prezıdenti Emmanýel Makronmen kezdesý ótkizdi. Kezdesý Beıjińdegi Tıananmen alańynda ornalasqan Halyq jınalysy úıinde ótti, dep habarlaıdy QazAqparat tilshisi.

Sınhýa agenttiginiń aqparatyna qaraǵanda, Sı Tszınpın Frantsııa Prezıdentiniń úsh jyldan keıingi Qytaıǵa kezekti memlekettik saparyn quptaıtyndyǵyn atap ótken.

Onyń aıtýynsha, eki taraptyń birlesken kúsh-jigeriniń arqasynda qytaı-frantsýz qarym-qatynasy oń ári turaqty damýyn saqtap qaldy. Ekijaqty taýar aınalymy da barynsha qarqyn ósip kele jatyr. Elder aeroǵarysh, aýyl sharýashylyǵy, azyq-túlik jáne ózge de salalarda oń nátıjelerge qol jetkizdi.

QHR Tóraǵasy Qytaı men Frantsııa klımattyń ózgerýi, bıoalýantúrlilik jáne Afrıkany damytý syndy máseleler aıasynda da tyǵyz baılanys ustanatyndyǵyna toqtalǵan.

Ol Qytaı men Frantsııa BUU Qaýipsizdik keńesiniń turaqty múshesi, iri táýelsiz memleket, sonymen qatar kóppolıarly álem ıdeıasy men halyqaralyq qatynastardyń demokratııalanýyn myǵym jaqtaýshy retinde aıyrmashylyqtar men shekteýlerdi eńserýge, turaqty, ózara tıimdi, jańashyldyq baǵyttardy ustanýǵa, qytaı-frantsýz jalpyqamtymdy strategııalyq seriktestigin ilgeriletýge, búkil álemdegi turaqtylyq pen órkendeýdi qoldaýǵa qabiletti ári mindetti ekendigin atap ótti.

«Bul sapar qytaılyq-eýropalyq qarym-qatynastyń damýyna tyń serpin beretindigin senimdimin», - dep atap ótedi Sı Tszınpın.