Beıjińde QR Tuńǵysh Prezıdenti kúni atalyp ótti

NUR-SULTAN. QazAqparat – QHR-daǵy QR Elshiligi Qazaqstan Respýblıkasynyń Tuńǵysh Prezıdenti kúni qurmetine oraı qazaqstandyq dıplomattar men ulttyq kompanııalar qyzmetkerleriniń mektep jasyndaǵy balalarynyń saltanatty merekesi bolyp ótti, dep habarlaıdy QazAqparat tilshisi.

Qazaqstannyń Ánurany oryndalǵannan keıin jas jetkinshekter Otan men Tuńǵysh Prezıdent jaıly óleń oqydy.

Jas qazaqstandyqtar Qazaqstannyń XXI ǵasyryndaǵy jetistikteri men jeńisterine arnalǵan shyǵarmashylyq jumystaryn kórsetti.

Kesh «Qazaq eli» tolyqmetrajdy tarıhı mýltfılmin kórsetýmen aıaqtaldy. Qazaqstannyń Tuńǵysh Prezıdenti kúnine oraı Beıjińde mýltıplıkatsııalyq shyǵarmashylyq patrıottyq fılmderdi kórsetý – jyl saıynǵy dástúrge aınalǵan. Ótken jyly dál osy dástúr boıynsha balalarǵa «Balalyq shaǵymnyń aspany» fılmi kórsetilse, 2017 jyly jas jetkinshekter «Er Tóstik pen Aıdahar» anımatsııaly fılmin tamashalaǵan.

Aıta keterligi, jeltoqsan aıynyń basynda Beıjińde Qazaqstan Respýblıkasynyń Tuńǵysh Prezıdenti kúni qurmetine oraı «Baldyrǵan» damý ortalyǵy ashylady.

Rýslan Súleımenov