Beıjińde QR Táýelsizdiginiń 30 jyldyǵyna arnalǵan onlaın konferentsııa ótti
Konferentsııany ashqan QR Syrtqy ister mınıstriniń birinshi orynbasary Shahrat Nuryshev: «Bıylǵy jyl Qazaqstan úshin Táýelsizdiktiń 30 jyldyǵymen tuspa-tus keldi. Osy jyldar ishinde jas memlekettiń qalyptasýynan senimdi damyp kele jatqan zamanaýı ekonomıkasy, turaqty ishki jáne syrtqy saıasaty bar halyqaralyq qoǵamdastyqtyń bedeldi múshesine deıingi joldy Qazaqstan abyroımen júrip ótti», - dedi.
Qazaqstandyq dıplomat 2022 jyldyń qańtarynda Qazaqstan men Qytaı arasyndaǵy dıplomatııalyq qarym-qatynastar 30 jyldyq mejeden ótetinin eske salyp, elder arasynda BUU, ShYU jáne AÓSShK aıasynda tyǵyz ózara is-qımyl júzege asyrylyp jatqanyn atap ótti.
QHR Úkimetiniń Eýrazııa isteri jónindegi arnaıy ókili Lı Hýeı óz sózinde qazirgi Qazaqstannyń ekonomıkasy qarqyndy damyp kele jatqanyn, sondaı-aq eldiń halyqaralyq bedeli ilgerilep kele jatqanyn aıtty. «Qazaqstan búginde Eýrazııa qurlyǵynda jáne álemdik arenada mańyzdy ról atqaratyn eń belsendi memleketke aınaldy», - dep atap ótti Qytaı dıplomaty.
Sondaı-aq, is-shara barysynda qatysýshylar Qazaqstan-Qytaı yntymaqtastyǵynyń qazirgi jaǵdaıy men damý perspektıvalaryn talqylady.
Qazaqstan Respýblıkasy Táýelsizdiginiń 30 jyldyǵyna arnalǵan halyqaralyq praktıkalyq onlaın konferentsııany QR-nyń QHR-daǵy Elshiligi Qytaı qoǵamdyq ǵylymdar akademııasymen birlesip uıymdastyrdy.
Halyqaralyq onlaın konferentsııaǵa QR men QHR jetekshi ǵylymı-zertteý ortalyqtarynyń basshylyǵy men sarapshylary qatysty.
