Beıjińde QR Parlament saılaýyn ótkizýge ýchaske ázirlendi (FOTO)
BEIJІŃ. QazAqparat - Búgin Qazaqstan Respýblıkasynyń QHR-daǵy Tótenshe jáne Ókiletti Elshisi Shahrat Nuryshev 20 naýryzda Beıjiń qalasynda QR Parlament Májilisiniń depýtattar saılaýynyń ótýi boıynsha saılaý komıssııasynyń múshelerimen, dıplomattarmen jáne ulttyq kompanııalardyń ókilderimen qorytyndy jıyn ótkizdi.
«Qytaı Halyq Respýblıkasynda 4 saılaý ýchaskesi: Beıjiń, Shanhaı, Úrimji jáne Gonkongta quryldy. Beıjińde №207 saılaý ýchaskesi jumys isteıdi. Ýchaskelik saılaý komıssııasynyń quramy elshilik qyzmetkerleri men ulttyq kompanııalar ókilderinen quraldy», - dedi qazaqstandyq jýrnalısterge bergen suhbatynda №207 ýchaskesi saılaý komıssııasynyń tóraǵasy, Qazaqstannyń QHR-daǵy Elshiliginiń keńesshisi Manarbek Qabazıev.
Onyń sózine qaraǵanda, qazir atalǵan ýchaske boıynsha saılaýshylardyń sany 2 myń adamnan asady. Negizinen bul Beıjińde jáne osy jerge jaqyn qalalarda oqıtyn stýdentter, elshilik qyzmetkerleri men ulttyq kompanııalardyń ókilderi, sonymen birge olardyń januıalarynyń músheleri.
«Sonymen qatar, bizge konstıtýtsııalyq quqyǵyn júzege asyrýǵa yntaly osy eldi emdelip júrgen, qyzmettik babymen nemese issaparmen júrgen Qazaqstan Respýblıkasynyń azamattarynan ótinishter túsip jatyr», - dep qosty M.Qabazıev.
Dıplomat №207 saılaý ýchaskesiniń jumys ýaqyty tańǵy saǵat 7.00-den keshki 20.00-ge deıin jalǵasatynyn eske saldy.
