Beıjińde QR men QHR temirjol ákimshilikteri Qazaqstan aýmaǵymen Qytaı-Eýropa tranzıttik júk aǵynyn ósirýge ýaǵdalasty
ASTANA. QazAqparat - 13 sáýirde Beıjińde «Qazaqstan temir joly» UK» AQ prezıdenti Qanat Alpysbaev Qytaı temir joldarynyń bas dırektory Lý Dýnfý kezdesip kelissóz júrgizdi.
Taraptar QR men QHR temirjol ákimshilikteri arasyndaǵy «Nurly jol» baǵdarlamasy men «Jibek joly ekonomıkalyq beldeýi» bastamashylyǵynyń damý bolashaǵyn talqylady, dep habarlaıdy «Qazaqstan temir joly» UK» AQ baspasóz qyzmeti.
Qytaıdan Eýropaǵa halyqaralyq júk tasymaldaýdy damytýdyń bes jyldyq jospary túzilgen. Qazaqstan transqurlyqtyq tranzıttik tasymaldaýdy damytýǵa belsendi qatysýshy bolyp tabylady.
2015-2016 jyl qorytyndysynda Qytaıdan Eýropaǵa halyqaralyq konteınerlik tasymaldaýdyń birneshe esege artqandyǵy baıqaldy.
2016 jyly 104,5 myń JFE jetti. 2020 jyldary Qytaı-Eýropa tranzıttik konteınerlik tasymal kólemin 800 myń JFE jetkizý kózdelip otyr.
Kezdesý barysynda Qazaqstan men Qytaı arasyndaǵy temirjol kóligin paıdalanýdyń 2016 jyl men bıylǵy jylǵy birinshi toqsannyń qorytyndysy qaraldy. Ótken jyly QR men QHR arasyndaǵy júk tasymaly 16,6 paıyzǵa ósip, aldyńǵy jylmen salystyrǵanda 8 mıllıon tonnaǵa artyq bolsa, bıylǵy jyly bul mólsherdi 10 mıllıon tonnaǵa jetkizý josparlanyp otyr.
Q. Alpysbaev konteınerlik júk aǵynyn Alashańqaı-Dostyq memleketaralyq shekaralyq ótkelden Qorǵas-Altynkól arqyly «Qorǵas-Shyǵys qaqpasy» AEA Qurǵaq portynda óńdeýge baǵyttaý sharasy týraly habarlady.
Kelissózder nátıjesinde Qytaı-Eýropa baǵdarynda konteınerlik poıyzdy uıymdastyrý, sonymen qatar 2017 jyly mamyrdan bastap «Astana -Altynkól» baǵdarymen «Tulpar- Talgo» JShS vagondarynan jasaqtalǵan júrdek jolaýshylar poıyzyn EKSPO-2017 halyqaralyq kórme aıasynda uıymdastyrý boıynsha Kelisimge qol qoıyldy.
