Beıjińde Qazaqstannyń Táýelsizdik kúnine arnalǵan resmı shara ótti
BEIJІŃ. 15 jeltoqsan. QazAqparat /Rýslan Súleımenov/- Beıjińde Qazaqstan Respýblıkasynyń Qytaı Halyq Respýblıkasyndaǵy Elshiliginiń uıymdastyrýymen Qazaqstannyń Táýelsizdik merekesiniń 19 jyldyǵyna arnalǵan resmı qabyldaý ótti,
dep habarlady Elshiliktiń baspasóz qyzmetinen.
Sharaǵa sheteldik dıplomatııalyq mıssııalardyń basshylary men qyzmetkerleri, Qytaı mınıstrlikteri men vedomstvolarynyń, analıtıkalyq jáne akademııalyq qurylymdardyń, isker toptardyń ókilderi, jýrnalıster, Qytaıdaǵy qazaq dıasporasynyń ókilderi jáne Beıjińde oqyp jatqan qazaqstandyq stýdentter, barlyǵy 450-den astam adam qatysty.
Alǵysóz sóılegen Elshi Ikram Adyrbekov, álemdik qoǵamdastyqtyń salystyrmaly túrde jas múshesi bolyp tabylatyn Qazaqstannyń jahandyq úderisterge belsendi atsalysýǵa degen óz talpynysyn pash etip úlgergenin atap kórsetti. Aǵymdaǵy jyly Eýropadaǵy qaýipsizdik jáne yntymaqtastyq uıymyna tóraǵalyǵynyń aıasynda Astanada EQYU Sammıtin uıymdastyryp, keńistiktegi ózekti problemalardy talqylaý úshin úlken jaryssóz alańyn usynǵan Qazaqstan óz mıssııasyn sátti oryndap shyqty, dedi dıplomat óz sózinde.
Sondaı-aq, Qazaqstannyń Qytaımen ózara senimge, túsinistikke jáne qoldaýǵa negizdelgen tatý kórshilik, ózara tıimdi jáne birizdi qarm-qatynas ornatýǵa úlken mán beretindigi aıtyldy.
Elshi sondaı-aq 2011 jyly Qazaqstannyń Qytaıdan azııalyq sporttyq estafetany qabyldaıtynyn, elimizde VII qysqy Azııa oıyndary ótetinin aıta kelip, jınalǵan qaýymdy osynaý aıtýly oqıǵaǵa shaqyrdy.
Resmı sharanyń aıasynda aldaǵy Azıada oıyndary týraly fotokórme uıymdastyrylyp, beınerolık kórsetildi. Sondaı-aq Prezıdent N.Nazarbaevtyń aǵymdaǵy jyly jasaǵan negizgi baıandamalarynyń qytaı tilindegi jınaǵy tanystyryldy.
