Beıjińde Qazaqstan sýretshileriniń týyndylary tanystyryldy

BEIJІŃ. QazAqparat – Qazaqstandyq sýretshiler álemdegi eń iri art-alań – 8-shi Beıjiń halyqaralyq kórkem bıennalesine qatysty. Shara Qytaı astanasynda osy aptada aıaqtaldy, dep habarlaıdy QazAqparattyń menshikti tilshisi.

Olardyń arasynda tanymal qazaqstandyq sýretshi Aransha Sharjanovtyń «Spring» kartınasy bar. Sondaı-aq, jas qazaqstandyq sýretshiler: Tátibaeva Gúlmaral («Aigolek»), Jánibek Sáýlet («Traffic Regulations») jáne Ásemqul Beıbit («Graphic Brothers») óz jumystaryn usyndy.

Bıylǵy bıennaleniń urany – «Kóp tústi álem men birlesken bolashaq» boldy. Kórmege 113 elden 595 sýretshiniń 640 týyndysy qoıyldy. Shanhaı yntymaqtastyq uıymyna múshe elderden kelgen sheberlerdiń jumystaryna arnalyp alǵash ret jeke ekspozıtsııa uıymdastyryldy. Onda A. Sharjanovtyń «Spring» kartınasy jurtshylyq nazaryna usynyldy.

Bıennale uıymdastyrýshylarynyń aıtýynsha, sýretshilerdiń taqyryptary tabıǵatqa, ómirge jáne adamzattyń jalpy taǵdyryna arnalǵan. Kórme Qytaıdyń Ulttyq kórkem mýzeıinde («Meıshýgýan» galereıasynda) ótti.

Avtor: Rýslan Súleımenov