Beıjińde Qazaqstan-qytaı jobalarynyń qarjylandyrylýy talqylandy
BEIJІŃ. QazAqparat - Qazaqstannyń Qytaıdaǵy elshisi Shahrat Nuryshev Jibek joly qorynyń basqarma tóraǵasy Tszın Tsımen kezdesti, dep habarlaıdy «QazAqparat» HAA Qytaıdaǵy tilshisi.
Taraptar osy maqsatqa arnaıy qurylǵan Qazaqstan-qytaı qory aıasynda ındýstrııalandyrý jáne ınvestıtsııalaý salasyndaǵy ekijaqty jobalardy qarjylandyrý máselelerin talqylady. 14-15 mamyr kúnderi Beıjińde ótken joǵary deńgeıli «Bir beldeý, bir jol» halyqaralyq yntymaqtastyq forýmynyń nátıjesi jaıly pikir almasty.
Tszın Tsı QHR tóraǵasy Sı Tszınpınniń forým barysynda aıtyp ótken qor kapıtalyn 100 mlrd. ıýanǵa (shamamen 15 mlrd.dollar) arttyrý jaıly sheshimi birlesip júzege asyrylatyn ınvestıtsııalyq jobalardyń sanyn arttyrýǵa múmkindik týǵyzatyndyǵyn atap ótti.
Óz kezeginde Sh.Nuryshev Jibek joly qory Azııa ınfraqurylymdyq ınvestıtsııalar bankimen qatar «Bir beldeý, bir jol» bastamasy aıasyndaǵy jobalardy qarjylandyratyn negizgi mehanızmderdiń biri ekendigin jáne onyń eki el arasyndaǵy kelisimderdi júzege asyrýdaǵy mańyzdylyǵyn aıtyp ótti.
Jibek joly qory damý jáne ınvestıtsııanyń orta jáne uzaqmerzimdi qory ekendigin esterińizge salamyz. Qordyń maqsaty - Azııa jáne dúnıejúzi ınvestorlaryn «Jibek jolynyń ekonomıkalyq beldeýi» jáne «HHІ ǵasyrdyń teńiz Jibek joly» baǵdarlamalaryn qurýǵa tartý.
