Beıjińde qazaq kúresinen Azııa federatsııasynyń keńsesi ashyldy
BEIJІŃ. QazAqparat - Búgin Beıjińde qazaq kúresinen Azııa federatsııasy keńsesiniń ashylý saltanaty boldy, dep habarlaıdy «QazAqparat» HAA Qytaıdaǵy tilshisi.
Sharaǵa qatysýshylar aldynda Dúnıejúzilik qazaq kúresi federatsııasynyń prezıdenti Serik Tókeev sóz alyp, Qazaqstan táýelsizdik alǵan jyldardan keıingi atalǵan sport túriniń damý tarıhy týraly qysqasha baıandap ótti.
S. Tókeev qazaq kúresinen Azııa federatsııasynyń prezıdenti Serik Kenenbaı, QHR Ulttyq olımpıada komıtetiniń tóraǵasy Sýn Tszıanlın jáne basqa da Beıjińdegi qazaq kúresinen Azııa federtsııasy keńsesiniń ashylýyna úles qosýshylarǵa alǵysyn bildirdi.
«QHR-ynda qazaq kúresinen iri halyqaralyq jarystar 2011 jyldan beri ótkizilip keledi. 2013 jyly Aqsaı Qazaq avtonomııalyq aýdanynda eresekter arasyndaǵy 9-nshy Azııa chempıonaty ótkizildi. 2015 jyly Altaı aımaǵynda 11-inshi Azııa chempıonaty, 2016 jyly Mońǵolkúre qalasynda 6-ynshy álem chempıonaty ótkizildi», - dep atap ótti ol.
S. Tókeev qazaq kúresi 2018 jyly Indonezııanyń astanasy Djakarta qalasynda ótetin jazǵy Azııa oıyndarynyń baǵdarlamasyna engizilýi múmkin ekendigin atap ótti.
Aıta keteıik, Dúnıejúzilik qazaq kúresi federatsııasy 2004 jyly Mıýnhen qalasynda (Germanııa) ótken dúnıejúzi qazaqtarynyń quryltaıynda qurylǵan bolatyn.
2004 jyldan 2010 jylǵa deıin úsh álemdik birinshilik (2006 - Almaty, 2008-Orsk, 2010 - Astana) jáne bir Eýropa chempıonaty ótkizildi.
