Beıjińde halyqaralyq Jibek joly akademııasy qurylady
ASTANA. QazAqparat - Qyrkúıek aıynyń sońynda Beıjińde halyqaralyq Jibek joly akademııasy qurylady, dep habarlaıdy QazAqparat tilshisi.
Bul týraly «G-GLOBAL» halyqaralyq hatshylyǵynyń jetekshisi Serik Nógerbekov Nazarbaev Ýnıversıtetinde ótip jatqan Jibek joly halyqaralyq birlesken ınnovatsııalar forýmynda málimdedi.
«Qazaqstan ulttyq jaratylystaný ǵylymdary akademııasy «G-GLOBAL» halyqaralyq hatshylyǵymen birlesip, eki jyl buryn halyqaralyq Jibek joly akademııasyn qurý týraly bastama kóterdi. Eki jylda úlken uıymdastyrýshylyq jumys atqaryldy. Birlesip kúsh salýdyń arqasynda «Bir beldeý - bir jol» halyqaralyq jobasyn júzege asyryp jatqan 16 memlekettiń ǵalymdary birigedi. Shamamen 25 qyrkúıek kúni Beıjińde Eýrazııa ekonomıkalyq forýmy aıaqtalǵan soń, quryltaı konferentsııasy ótkiziledi. Onda biz - 16 memlekettiń bilim berý uıymdarynyń ókilderi men ǵalymdary halyqaralyq Jibek joly akademııasynda bas qosamyz», - dedi S.Nógerbekov.
Onyń aıtýynsha, «Bir beldeý - bir jol» halyqaralyq jobasyn tıimdi júzege asyrý úshin ekonomıst-ǵalymdar memlekettik organdardyń, halyqaralyq jáne úkimettik emes uıymdardyń, shaǵyn jáne orta bıznes kásiporyndarynyń basshylaryn biriktiredi. Bıyldan bastap, Astana ekonomıkalyq forýmy aıasynda Jibek joly birlesken ınnovatsııalar forýmdary ótkiziledi.
