Beıjińde elshi áıelder «tusaýkeser» rásimin ótkizdi
BEIJІŃ. QazAqparat - Qytaıdaǵy QR Elshiligi Naýryz meıramy qarsańynda Beıjińde akkredıttelgen elshi áıelder men dıplomatııalyq ókildik basshylarynyń áıelderine arnalǵan qabyldaý uıymdastyrdy, dep habarlaıdy «QazAqparat» HAA Qytaıdaǵy menshikti tilshisi.
QHR-daǵy QR Elshisiniń jubaıy Álııa Nurysheva qonaqtarǵa kóktemgi Naýryz merekesiniń tarıhy men mán-maǵynasyn aıtyp berdi. Qonaqtar Qazaqstan jáne Astanada ótetin «EKSPO-2017» kórmesi týraly fılmderdi tamashalap, kóshpendiler tirshiligimen tanys boldy, qazaqtyń «tusaýkeser» dástúrin kórdi.
QHR-daǵy Qyrǵyzstan elshisi Qanaıym Baqtyǵulova, Qytaıdaǵy Túrkimenstan elshisi Chınar Rýstamova jáne Álııa Nurysheva kishkentaı Alan, Eraly jáne Ersultandardyń tusaýyn kesti. Sharaǵa jınalǵandar rásimdi úlken qyzyǵýshylyqpen baqylady.
Mereke qonaqtary Qazaqstan týraly fotokórme men Ortalyq Azııa elderiniń materıaldyq jáne rýhanı zattary beınelengen stendterdi qarap shyqty. Naýryz kóje, baýyrsaq, manty, palaý sekildi Qazaqstan, Túrkimenstan jáne ózge de ortalyqazııalyq respýblıkalardyń ulttyq taǵamdarynan dám tatty.
«Bárin jaqsy oılastyrǵan, tanystyrdy, kórsetti. Meniń oıymsha, búgin álemniń túkpir-túkpirinen jınalǵan áıelder Qazaqstan men onda ótetin EKSPO kórmesi jaıly biraz maǵlumatpen tanysty. Naýryz kójeden dám tatqan qonaqtar qazaq taǵamdaryna tánti boldy», - dedi Qytaıdaǵy Lıtva elshisi Inna Marchýlıonıte.
Qytaıdaǵy Sýrınam respýblıkasy elshisiniń jubaıy Olıvera Pınas biraz jyldan beri qazaq mádenıetine qyzyǵýshylyq tanytyp júrgenin, jaqyn arada kúıeýimen Qazaqstanǵa barýǵa daıyndalyp júrgenin jetkizdi.
