Beıjińde «El júregi -Astana» atty fýtbol týrnıri ótti
BEIJІŃ.QazAqparat - Búgin Astananyń 20 jyldyǵyn atap ótý sharasy aıasynda Qazaqstannyń QHR-daǵy elshiligi «El júregi - Astana» atty shaǵyn fýtboldan týrnır uıymdastyrdy, dep habarlaıdy «QazAqparat» HAA-niń Qytaıdaǵy menshikti tilshisi.
Jarysqa 40 adamnan turatyn 5 komanda qatysty. Olardyń arasynda qazaqstandyq dıplomattar, stýdentter, ulttyq kompanııa ókilderi men olardyń otbasy músheleri bar. Jarysqa qatysýshylarǵa óziniń quttyqtaýyn Qazaqstannyń QHR-daǵy elshisi Shahrat Nuryshev joldady.
Týrnırdiń eń úzdik shabýylshysy ataǵyna Azamat Teltaı laıyqty dep tanyldy. Ol qarsylastarynyń qaqpasyna 7 gol saldy. Eń myqty qaqpashy ataǵyna Ábý-Tálip Aımahanov ıe boldy.
«Mundaı sharalar Otannan alysta júrgen bizge Astananyń 20 jyldyǵynyń jaqyndap kele jatqanyn shyn júrekten sezinýge múmkindik beredi. Elordamyzdyń mereıtoıy barlyq qazaqstanyqtar úshin mańyzdy shara»,-dedi «QazAqparat» HAA tilshisine bergen suhbatynda A.Teltaı.
Aıta keteıik, Qazaqstan astanasynyń 20 jyldyǵyn atap ótýge arnalǵan «El júregi-Astana» tujyrymdamasynda qoǵamdyq-saıası jáne mádenı-buqaralyq sharalar qarastyrylǵan. Qujatty 2017 jyldyń 27 qyrkúıeginde Prezıdent Nursultan Nazarbaev bekitken.
Ony júzege asyrý aıasynda Qazaqstannyń Qytaıdaǵy elshiligi basketboldan jarys jáne kóptegen kontsertter, kórmeler men ózge de birqatar mádenı sharalardy uıymdastyrýdy kózdep otyr.
Aqpanda Qazaqstannyń Qytaıdaǵy elshiligi «El júregi-Astana» atty uranmen tennıs jarysyn ótkizgen bolatyn.
