Beıjińde ekinshi bala týýǵa ruqsat berildi
BEIJІŃ. QazAqparat - Qytaı astanasy Beıjiń qalasynda erli-zaıyptylarǵa ekeýiniń biri óz otbasynda jalǵyz bolsa, ekinshi balaly bolýlaryna ruqsat etiletin boldy. Mundaı sheshimdi búgin Beıjiń zańnamalyq jınalysy sessııasynyń kezekti otyrysynda halyq depýtattary qabyldady.
Qytaı astanasy «bir otbasy - bir bala» demografııalyq saıasatyn bosańsytqan Anhoı, Chjetszıan jáne Tszıansı provıntsııalarynan keıingi tórtinshi ákimshilik-aýmaqtyq birlik atandy.
Qytaıda 1970 jyldyń aıaǵynan bastap qoldanysqa engizilgen bala týýǵa qatań tyıym salý saıasaty eldiń eńbekke qabiletsizdigi, halyqtyń tez qartaıýy, genderlik teńgerimsizdik sııaqty keraǵar kóptegen áleýmettik problemalar týdyrdy.
QHR bıliginiń 18-shi shaqyrtýynda QKP OK-nyń qarashada ótken 3-shi plenýmynyń barysynda «bir otbasy - bir bala» saıasatyn jumsartý týraly sheshim qabyldandy.
2010 jyly halyqtyń jalpyqytaılyq sanaǵy nátıjesi boıynsha QHR halqy 1, 34 mlrd. bolǵan. Boljam boıynsha, 2050 jyly 60 jastan asatyn qarttardyń sany el halqynyń úshten birin quraıdy. 2030 jyly mıllıondaǵan qytaı er azamattary ózderiniń jarlaryn tabý múmkindiginen aırylady.
Jergilikti bıliktiń málimdeýinshe, Qytaı teńgerimdi áleýmettik-ekonomıkalyq damýdy qamtamasyz etý úshin el halqyn 1,5 mlrd. deńgeıinde ustaýy qajet.
