Beıjińde Astanadaǵy LRT qurylysyn jedeldetý máselesi talqylandy
BEIJІŃ. QazAqparat - Qazaqstannyń Qytaıdaǵy Elshisi Shahrat Nuryshev Beıjiń qalasynyń vıtse-meri In Hetszıýnmen birge aımaqaralyq ózara árekettestik, saýda-ekonomıkalyq jáne ınvestıtsııalyq yntymaqtastyq máselelerin talqylady, dep habarlaıdy «QazAqparat» HAA Qytaıdaǵy menshikti tilshisi.
Sh. Nuryshev bıyl eki el arasyndaǵy dıplomatııalyq qarym-qatynastardyń ornaǵanyna 25 jyl tolǵanyn atap ótti.
«Bul ýaqyt aralyǵynda bizdiń saıası, saýda-ekonomıkalyq, kólik jáne mádenı-gýmanıtarlyq salalardaǵy ózara árekettestik qarqyndy damydy. QHR Tóraǵasy sońǵy tórt jylda Qazaqstanǵa úsh ret keldi, bul bizdiń ózara qarym-qatynasymyzdyń joǵary deńgeıiniń aıǵaǵy», - dedi ol.
Taraptar aımaqaralyq ózara árekettestik pen QR qalalarymen jáne oblystarymen baılanys ornatýdyń keleshegin talqylady.
Qazaqstan Elshisi qyrkúıek aıynda QHR Gýansı-Chjýan avtonomdy aımaǵynyń Nannın qalasynda ótetin aımaqaralyq yntymaqtastyq forýmy aıasynda ózara baılanysty nyǵaıtýǵa shaqyrdy.
Kezdesýde Astanadaǵy jeńil relsti kólik (LRT) júıesiniń qurylysyn jedeldetý týraly Astana ákimi Áset Isekeshev pen Beıjiń meri Tsaı Tsı arasyndaǵy ýaǵdalastyqty júzege asyrýdy talqylaýǵa erekshe kóńil bólindi. Onda jobanyń ındýstrıaldy-ınvestıtsııalyq yntymaqtastyq baǵdarlamasyna enetini jáne ony tabysty júzege asyrýdyń eki el arasyndaǵy dostyqtyń joǵary deńgeıin kórsetý qajettigi basa aıtyldy.
