Beıjińde aldaǵy nóserlerge baılanysty qaýiptiń sary deńgeıi jarııalandy

BEIJІŃ. QazAqparat – Beıjiń bıligi kele jatqan uzaqqa sozylatyn nóserlerge baılanysty qaýiptiń sary deńgeıin jarııalady. Meteorologtardyń boljaýynsha, nóser qytaılyq astanaǵa jeksenbi kúni keshke jaýmaq. Bul týraly Beıjiń qalasynyń meteorologııalyq qyzmetiniń málimdemesinde aıtylǵan, dep habarlaıdy QazAqparattyń menshikti tilshisi.

Boljamǵa sáıkes, Beıjińde nóser jeksenbi keshke bastalyp, kelesi seısenbige deıin jalǵaspaq. Meteorologtardyń baǵalaýynsha, aldaǵy eki kún ishinde qytaılyq megapolıste 60-100 mm jaýyn-shashyn jaýady, alaıda jekelegen aýdandarda bul kórsetkish 300 mm-ge deıin jetýi múmkin.

Jeksenbi kúni Beıjińde jáne onyń aınalasynda kóptegen týrıstik nysandar jabyldy. Olardyń ishinde Uly Qytaı qorǵanynyń birqatar ýchaskeleri bar.

Beıjińniń 16 aýdanynyń 15-inde jyljyp kele jatqan nóserlerge baılanysty qaýiptiń sary deńgeıi engizildi, sınoptıkterdiń boljaýy boıynsha, nósermen qosa, bul kúnderi 7-den 9 balǵa deıin ekpindi jel soǵady.

Jeksenbi kúni QHR-dyń meteorologııalyq basqarmasy kele jatqan nóserler men daýyldarǵa baılanysty Soltústik Qytaıdyń basqa da birqatar óńirlerinde tótenshe áser etýdiń tórtinshi deńgeıin jarııalady.

QHR-da tabıǵı apattardy eskertýdiń tórt deńgeıli júıesi engizilgen. Júıe boıynsha qaýiptiń ósýi kók, sary, qyzǵylt sary jáne qyzyl degen rettilikpen berilip otyrady.