Beıjińde A (H1N1) tumaýyna qarsy vaktsına egý bastaldy
ASTANA. Qazannyń 22-si. QazAqparat - Beıjińde A (H1N1) tumaýyna qarsy vaktsına egý bastaldy. Qalada bilikti dárigerler turǵyndarǵa vaktsına egetin 429 medıtsınalyq ýchaske ashyldy.
Bul maqsatqa 1,7 mıllıon dozadan astam vaktsına ázirlenip otyr, dep habarlaıdy «Sınhýa» agenttigi.
Jergilikti ókimettiń sheshimine sáıkes aldymen azamattardyń jekelegen sanattaryna, atap aıtqanda medıtsınalyq qyzmetkerlerge, balalar men jasóspirimderge, oqytýshylarǵa, júkti áıelderge, qoǵamdyq kólik qyzmetkerlerine jáne qarttarǵa vaktsına tegin egiledi. Derek kózderdiń habarlaýynsha, atalǵan sanattarǵa kiretin adamdardyń barlyǵy 2009 jyldyń sońyna deıin vaktsına qabyldap bolady.
Beıjińde qazirgi ýaqytta «dońyz tumaýyn» juqtyrýdyń 5 myńnan astam oqıǵasy tirkelip otyr. Aýyrǵandardyń 80 paıyzy stýdentter ekenin aıta ketý kerek.
