Beıjińde 8-shi ret «Abaı oqýlary» ótti

ASTANA. QazAqparat – Beıjińde uly oıshyl, aqyn, dala ádebıeti men mádenıetiniń reformatory, qazaq ádebıetiniń negizin qalaýshysy Abaı Qunanbaıulynyń kúni atalyp ótti, dep habarlaıdy QR SІM baspasóz qyzmeti.

Іs-shara aıasynda qytaılyq oqýshylar men stýdentter Abaı óleńderin qazaq jáne qytaı tilderinde oqydy. Sondaı-aq Beıjiń halyq aspaptar orkestriniń ártisteri men Qytaı ulttary ortalyq ýnıversıtetiniń stýdentteri qazaq jáne qytaı ulttyq mýzykalyq aspaptarynyń súıemeldeýimen Abaı ánderin oryndady.

Jyl saıyn qytaılyq jurtshylyqty Abaıdyń eńbekterimen tanystyrý arqyly rýhanı aǵartý is-sharalaryn ótkizý, uly tulǵanyń eskertkishine gúl shoqtaryn qoıý, onyń shyǵarmalaryn oqý chellendjderin uıymdastyrý Beıjińniń ádebıet, óner jáne kórkem sóz áýesqoılary arasyndaǵy jaqsy dástúrge aınaldy.

Іs-sharanyń qonaqtary QHR-da akkredıttelgen birqatar dıplomatııalyq mıssııalardyń basshylary, memlekettik organdardyń, Qytaıdyń akademııalyq jáne shyǵarmashylyq zııalylary, qazaq dıasporasynyń ókilderi, sondaı-aq qazaqstandyq jáne qytaılyq BAQ jýrnalısteri boldy.