Beıjińde №207 saılaý ýchaskesi jumysynyń birinshi saǵatynda 60-tan astam adam daýys berdi (FOTO)
BEIJІŃ. QazAqparat - QR Parlamenti Májilisine depýtattardy saılaýǵa álemde alǵashqylardyń biri bolyp QHR-daǵy QR Elshiligi janyna qurylǵan №207 saılaý ýchaskesi óz jumysyn bastady. Ýchaske ashylǵannan bastap bir saǵat ishinde (Astana ýaqyty boıynsha 05.00-den 06.00-ge deıin) 60-tan astam adam daýys berdi. Bul týraly QazAqparatqa bergen suhbatynda ýchaskeniń saılaý komıssııasynyń tóraǵasy Manarbek Qabazıev habarlady.
Qazaqstan Respýblıkasynyń Ánuranyn oryndaǵannan keıin alǵashqy bolyp dıplomatııalyq ókildik basshysy Shahrat Nuryshev pen onyń zaıyby daýys berdi.
Odan keıin Beıjińde jumys saparymen júrgen QR Aýyl sharýashylyǵy vıtse-mınıstri Gúlmıra Isaeva jáne onyń vedomstvosynyń qyzmetkerleri, dıplomattar, olardyń otbasy músheleri, ulttyq kompanııa ókilderi óz konstıtýtsııalyq quqyǵyn oryndady.
Alǵashqylardyń biri bolyp Beıjiń til jáne mádenıet ýnıversıtetiniń tildik kýrsynda bilim alyp jatqan 18 jastaǵy Kámılá Atıeva daýys berdi, ol estelikke kádesyı aldy.
Aspanasty eli astanasyna qyzmettik máselelermen kelgen Juldyzbek Seralıev 207-shi saılaý ýchaskesinde daýys berý barysynda qazaqstandyqtardyń belsendiligine oń baǵa berdi.
Shanhaı yntymaqtastyq uıymy Bas hatshysynyń orynbasary Sabyr Imandosovtyń jubaıy 70 jastaǵy Mánsııa Imandosova estelikke syılyq aldy. Ol saılaý ýchaskesiniń jumysynyń uıymdastyrylýy joǵary deńgeıde ekenin atap ótti. Úlkenge degen qurmeti úshin alǵys sezimin jetkizdi.
«Biz aǵa býyn Qazaqstan Respýblıkasynyń bolashaǵyn oılaımyz. Saılaý - bul otanymyzdyń mańyzdy sharasy. Eldiń gúldengenin, alǵa qoıǵan josparlardyń oryndalǵanyn qalaımyz. Sondyqtan da shyn júregimizben qoldap, saılaýǵa qatysýdamyz», - dedi ol QazAqparat tilshisine bergen suhbatynda.
