Beıjiń olımpıadasynyń júldegeri Erkebulan Shynálıev boksqa qaıta oralmaq
ASTANA. 2 mamyr. QazAqparat - Qazaqstannyń bokstan ulttyq quramasy sapynda 81 kelide óner kórsetip, 2008 jyly Beıjiń Olımpıadasynda qola medaldi enshilegen Erkebulan Shynálıev uzaq úzilisten keıin boksqa qaıtyp kelýge bel býdy.
Bul jóninde Otyrar-TV habarlady.
Beıjiń Olımpıadasynan keıin rıngten ǵaıyp bolǵan Erkebulan boksqa qaıtyp oralǵanyn málimdegen. Óziniń aıtýynsha, ol bir aı buryn jattyǵýǵa kirisipti. Sporttan uzaq ýaqyt qol úzip qalǵanyna qatty ókinetinin de jasyrmapty. Ótkende Astanada London Olımpıadasyna joldama úlestirgen saıysta qazaqstandyq Vasılıı Levıttiń 91 keli salmaqtaǵy lıtsenzııadan aıyrylyp qalǵanyn estigende barmaǵyn shaınaǵan kórinedi.
«Erterek jattyqpaı, sporttan qol úzip qalǵanyma qazir qatty ókinemin. Levıt joldamadan qaǵylǵanda keýdemde ókinish paıda boldy. Sportta júrgenimde bálkim sol joldamany men jeńip alyp, taǵy bir ret Olımpıadada baq synap kóretin edim», - deıdi boksshy.
Aıtpaqshy, Beıjińde 81 kelide bokstasqan Erkebulan qazir tolysyp, salmaǵy aýyr tartqan.
«Jattyǵýǵa qaıta kirisken kúni ólshep kórgende, salmaǵym 114 keli boldy. Bir aı jattyǵyp, 14 keliden aryldym. Endi salmaǵymdy 91 kelige deıin túsirýim kerek», - deıdi ol.
Sosyn 3-4 aıdan soń rıngke shyǵý da oıynda bar eken. Shyǵyp qana qoımaı, áli de halyqaralyq jarystarda, kem degende Azııa chempıonatynda top jaryp, Qazaqstan sportyna olja salsam dep bekinip otyr boksshy.
