Beıjiń Olımpıadasynyń dopıng isi ashylsa, saldary Qazaqstan sportshylaryna tıip ketýi de múmkin - A. Muhamedıuly

ASTANA. QazAqparat - Beıjiń Olımpıadasynyń dopıng isi ashylsa, onyń teris saldary Qazaqstan sportshylaryna tıip ketýi de múmkin. Búgin Májiliste ótip jatqan buqaralyq sportty jáne dene shynyqtyrýdy damytý taqyrybyndaǵy Úkimet saǵatynda Mádenıet jáne sport mınıstri Arystanbek Muhamedıuly osylaı málim etti.

Talqylaý barysynda depýtattar kásibı sporttaǵy dopıng máselesine nazar aýdarǵan. "Jaǵdaı ýshyǵyp otyr. Úlken derjava Reseıdiń ózinde áıgili sportshylar ataǵynan aıyrylyp jatyr. Bizge de jetip jatyr. Dopıngke uryndyrmaıtyn qandaı amal bar?» degen bolatyn depýtat Omarhan Óksikbaev.

Óz kezeginde Mádenıet jáne sport mınıstri Arystanbek Muhamedıuly birazǵa deıin elimizde sporttyq medıtsına men dopıng salasyna jetkilikti túrde kóńil aýdarylmaı kelgenin moıyndady. Onyń aıtýynsha, tek sońǵy jyldary bul baǵyttaǵy jumystar jolǵa qoıyla bastaǵan. Respýblıkalyq dopıngke qarsy ortalyq Astana qalasyna kóshirilip, eki júz mıllıon teńgege arnaıy zerthana ashylatyn bolady.

«Dopıng óte kúrdeli másele. Sońǵy eki jyl boıy osy máselemen aınalysyp kelemiz. Bizdiń sportshylarymyz da osyndaı úlken daýlarǵa ilikken bolatyn. Sondyqtan da, Qazaqstan dopıng máselesin durys jolǵa qoımasa, onda alda kedergiler kóptep shyǵa beredi. Eń ókinishtisi, qazir Beıjiń Olımpıadasyna qatysty dopıng isin ashatyny týraly sóz qozǵalyp jatyr. Eger bul ashylsa, álemde kóptegen yńǵaısyz jaǵdaılar oryn alýy múmkin, ol Qazaqstanǵa da qatysty bolýy yqtımal. Osy turǵydan alǵanda, biz Rıo Olımpıadasyna eń birinshi kezektegi daıyndyqty dopıng salasynan bastap otyrmyz», dedi vedomstvo basshysy.