Beıjiń Olımpıadasynda tý ustap shyqqan qazaq sportshylarynyń kıimi HOK mádenıe murasyna endi
Eksponattardy «Halyqaralyq Olımpıada komıtetiniń mádenı murasy» jınaǵyna tapsyrý týraly HOK prezıdenti Tomas Bah qol qoıǵan tıisti sertıfıkat Qazaqstan UOK-ne tabystaldy.
Beıjińde ótken Qysqy Olımpıada oıyndarynyń ashylý saltanatynda qazaqstandyq sheberlerdiń týyndysy kóptiń nazaryna bólenip, úzdikterdiń biri dep tanyldy. Qazaqstannyń Týyn ustap shyqqan short-trekshi Abzal Ájiǵalıev pen konkıshi Ekaterına Aıdovanyń kıimi halyqaralyq olımpıada qaýymdastyǵyn qatty tań qaldyrdy.
Kóptegen álemdik BAQ qazaqstandyq dızaınerler jasaǵan obrazǵa tánti boldy.
Brıtandyq bedeldi The Guardian gazeti Oıyndardyń ashylý saltanatynan keıin: «Qazaqstan kostıýmder baıqaýynda jeńiske jetti», – dep jazdy. Amerıkalyq The Insider basylymy «Ekaterına Aıdova klassıkalyq altyn áshekeılermen bezendirilgen kıimimen tań qaldyrdy» dep moıyndady.
Sonymen qatar azııalyq BAQ, sonyń ishinde Japonııanyń jetekshi ulttyq gazeti «Ýomıýrı» de basa nazar aýdaryp, «Tokıodaǵy Olımpıadadan keıin qazaqstandyq Tý ustaýshylardyń ádemi kıimderi Beıjińde eń kóp talqylanǵan taqyrypqa aınaldy» dep atap ótti.
Qazaqtyń has batyry obrazynda shyqqan Abzal Ájiǵalıev pen Ekaterına Aıdovanyń kóıleginde beınelengen saq patshaıymy Tomırıs beınesine joǵary baǵa berilgenin rastaı otyryp, Olımpıada murajaıy kostıýmdi «Halyqaralyq Olımpıada komıtetiniń mádenı murasy» toptamasyna engizýdi jáne ony tabystaý barysynda saltanatty rásim uıymdastyrýdy usyndy. Kollektsııada sportshylardyń eń jaqsy jabdyqtary bar – ol Olımpıada oıyndarynyń tarıhyn jáne olardyń elderdiń tarıhy men mádenıetimen tyǵyz baılanysyn aıqyn kórsetedi. Eksponattardyń kópshiligin sportshylar Olımpıada kezinde nemese Olımpıadadan keıin syıǵa tartqan.
Osy sátten bastap Qazaqstannyń Tý ustaýshysylarynyń kıimderi uıymnyń shtab-páteri ornalasqan shveıtsarııalyq Lozannadaǵy HOK bas murajaıy – álemdik olımpıadalyq qozǵalystyń «qazyna qorlaryna» kelýshilerdiń nazaryna usynylady.
Murajaı jumysyn 1915 jyly bastaǵan, 30 jylǵa jýyq tarıhy bar. Qazir murajaıda oıyn tarıhynyń myńdaǵan qundy eksponattary saqtalǵan. Jyl saıyn olardy kórýge álemniń túkpir-túkpirinen 500 myńnan astam adam keledi.
HOK Mádenı mura departamenti Olımpıada oıyndarynyń tarıhy men dástúrin saqtaı otyryp, búkil álemniń sportshylaryn biriktiredi.
Sportshylardyń saltanatty ashylý rásiminde kıgen kıimderi ulttyq qundylyqty, mádenıetti dáripteýdi kózdeı otyra daıyndalǵan bolatyn.
Altyn órnek kúndi beıneleıdi, al «qoshqar múıiz» dekory qorshaǵan álemmen úılesimdilikti, ómirge umtylysty, qunarlylyq pen molshylyqty beıneli túrde kórsetetin gúldi oıýmen úılesedi.
Erler kıiminiń negizgi elementine aınalǵan qalqan batyldyq pen qaısarlyqtyń, kúshtiń sımvolyn kórsetedi.
Dızaınerler Tokıodaǵy jazǵy Olımpıada oıyndarynyń ashylý saltanatynyń qarsańyndaǵydaı Ábilhan Qasteev atyndaǵy Memlekettik óner murajaıymen birge oıý-órnek elementterimen de jumys istedi.
Kostıýmdi qazaqstandyq dızaıner Vıoletta Ivanova daıyndady. Ol ótken jyly Tokıo Olımpıadasynyń ashylý saltanatynda Qazaqstannyń Tý ustaýshylarynyń obrazdarymen jumys istegen.
Viled Group kompanııasy kostıýmderdi tigý úshin Ivanovanyń daryndy komandasyn usyndy, al dızaıner men onyń sheberleri kezekti ret jaýapty tapsyrmany tamasha oryndap shyqty.
– Sport pen sán odaǵy áldeqashan álemdik podıýmdardy baǵyndyrdy. Tıisinshe, Olımpıada oıyndarynda sán álemine de qatysty tusaýkeserler ótedi. Árbir qatysýshy el biregeı toptama daıyndaıdy. Biz jaı ǵana ádemi kostıýmderdi tigip qana qoımaı, ony múmkindiginshe maǵynaly etýdi kózdedik. Biz Qazaqstan halqynyń árdaıym jandanǵanyn, qulpyrǵanyn kórgimiz keledi. Sondyqtan oıý-órnektiń negizi – eń bastysy ómirlik qýat kózi – Kún jáne jeńimpazdar kıetin altyn tús tańdaldy. Qara tús – tereńdik pen danalyqty bildiredi, sonymen qatar ol «qara shańyraq» – júzdegen jyldar boıy urpaqtan-urpaqqa jalǵasyp kele jatqan ýaqyt ótken saıyn qaraıǵan shańyraqqa da qatysty. Bizdiń atele úshin Qazaqstannyń Olımpıada quramasymen jumys isteý zor mártebe jáne esimizde máńgi qalatyn bolady, – dep bólisti sheber Vıoletta Ivanova.
Rásimge HOK ókilderi Olıve Nııamkı jáne Edvard Kensıngton, sondaı-aq qazaqstandyq syılyqty qabyldaǵan Olımpıada murajaıynyń ókili Patrısııa Reımond qatysty. Eksponattardy olımpıadalyq sportshy Ekaterına Aıdova mýzeıge syıǵa tartty.
– Beıjińdegi Qysqy Olımpıada oıyndarynyń ashylý saltanatyna Abzal Ájǵalıev ekeýmiz aıaq basqan sátten bastap alǵashqy mınýttardan-aq bar nazardyń kıimderimizge aýdarylǵanyn túsindik. Áriptesterimiz ben kórermenderdiń bizge degen kózqarasy bizdiń kıim obrazymyzdyń erekshe ekenin dáleldeı túskenin túsindik. Ýaıymdadyq, sonymen qatar maqtanysh pen tańdanys ta boldy. Sheberler ujymy shedevr jasady dep esepteımin. Bizdiń mádenıetimiz ben salt-dástúrlerimiz laıyqty túrde usynylǵanda, siz erekshe maqtanysh pen qoldaý sezinesiz. Búgin men taǵy da tolqyp otyrmyn, óıtkeni endi biz kıgen keremet kostıýmder álemniń túkpir-túkpirindegi adamdardy qazaq halqynyń qaıtalanbas salt-dástúrlerimen jáne tarıhymen tanystyrýdy jalǵastyrady, – dep, áserimen bólisti Ekaterına Aıdova.
Lozannadaǵy kostıýmderdi tapsyrý rásiminen keıin Ekaterına Aıdova HOK muraǵatyna enetin olımpıadalyq mádenıet jáne mura qorynyń «Words of Olympians» arnaıy jobasyna suhbat berdi.
