Beıjiń Nazarbaevtyń Prezıdenttik ókilettigi toqtaýyna oraı ustanymyn bildirdi

ASTANA. QazAqparat - Qytaı Nursultan Nazarbaevtyń Qazaqstan Prezıdenti ókilettigin toqtatý sheshimine túsinistikpen qaraıdy. Bul týraly búgin kúndelikti brıfıng barysynda QHR Syrtqy ister mınıstrliginiń resmı ókili Gen Shýan málim etti, dep habarlaıdy QazAqparat tilshisi.

«Nursultan Nazarbaev - Qazaqstan Respýblıkasynyń negizin qalaýshy, Ult kóshbasshysy. Qytaı tarapy onyń qabyldaǵan sheshimine túsinistik tanytady. Dıplomatııalyq qarym-qatynas ornaǵan sátten bastap 27 jyldyń ishinde Nursultan Nazarbaev Qytaı men Qazaqstan arasyndaǵy jan-jaqty strategııalyq ynytmaqtastyq qarym-qatynasyn ilgeriletýge septigin tıgizdi. Sonymen qatar «Bir beldeý - bir jol» bastamasyna qoldaý kórsetip, onyń júzege asyrylýyna belsendi qatysty», - dedi Gen Shýan qazaqstandyq jýrnalısterdiń saýalyna jaýap bere kele.

Onyń atap ótýinshe, Qazaqstan Prezıdenti laýazymyna kirisken Qasym-Jomart Toqaev Qytaıdyń jaqsy dosy sanalady. Osy rette ol Qazaqstan jańa Prezıdent kezinde de óz damýynyń jańa jetistikterine jetetindigine, qazaqstandyq-qytaılyq qarym-qatynas odan ary tabysty gúldene túsetindigine senimdi ekendigin basa aıtty.

«Qazaqstan - Qytaıdyń mańyzdy tatý kórshileriniń biri. Al qytaı-qazaqstandyq qarym-qatynas óte joǵary deńgeıde qalyptasqan jáne eki eldiń de múddesine saı keledi. Qytaı Qazaqstan Respýblıkasynyń damý keleshegine jáne eki jaqty qarym-qatynastarǵa mol senimmen qaraıdy», - dedi Gen Shýan.

Aıta keteıik, keshe Nursultan Nazarbaev respýblıkalyq telearnalar arqyly Qazaqstan halqyna úndeý arnap, onda Qazaqstan Respýblıkasynyń Prezıdenti retinde ókilettigin toqtatatyndyǵyn jarııa etken edi.

Al búgin QR Parlamenti palatalarynyń birlesken otyrysynda Respýblıka Prezıdenti ókilettigin ýaqytsha atqaratyn Qasym-Jomart Toqaev ant berdi.

Avtor: Sadyq Ákıjanov