Beıjiń halyq sany men avtokólik sanynyń artýyn ustap turýǵa qajetti sharalardy qolǵa alýda
BEIJІŃ. 31 qańtar. QazAqparat /Rýslan Súleımenov/ - Sońǵy jyldary Qytaı astanasyndaǵy halyq sany jyl saıyn kem degende 600 000 adamǵa artyp keledi.
Resmı statıstıkalyq málimetterge súıensek, 2009 jyldyń sońynda Beıjińde turaqty ómir súretin halyq sany 19,72 mln. adamdy quraǵan, onyń ishinde 12,46 mln. adam Beıjińde tirkelgen.
Al jergilikti BAQ aqparattary boıynsha, aǵymdaǵy jyldyń 31 qańtary men 2 aqpany aralyǵynda, Kóktem merekesiniń aldynda týys-týǵandarymen kezdesý úshin 10,6 mıllıonǵa jýyq adam Beıjińnen ketedi dep kózdelip otyr. Olardyń ishinde 5 mln. halyq Qytaı elordasynda tirkelmegen, biraq sonda ómir súretin adamdar qataryna jatady.
Beıjińniń 12-nshi besjyldyq kezeńge arnalǵan damý baǵdarlamasynda (2011-2015 jyldar) halyq sanynyń tym artýyn ustap turý jónindegi keshendi sharalardy qolǵa alý kerektigi jaıly aıtylǵan.
Sarapshylardyń pikirinshe, Beıjińdegi halyqtyń toqtaýsyz ári shamadan tys ósýi áleýmettik qyzmet kórsetý men qalalyq basqarý aldynda úlken qaýip tóndiredi, sonymen qatar kólik tasymaly, bilim berý, densaýlyq saqtaý men jyljymaıtyn múlik salasyndaǵy jaǵdaıdyń qıyndap ketýine sebepshi bolady.
Sońǵy jyldary qalada avtokólikterdiń tirkelý tizimi de artqany baıqalǵan. Eger de 1997 jyly Qytaı elordasynyń kóshelerinde 1 mln. avtokólik júrse, 2010 jyly bul sany 4,76 mıllıonǵa deıin artqan.
