Beıjiń-2022: Shańǵyshylarymyz shırek fınalǵa shyǵa almady
Atalǵan synda el namysyn erlerden Evgenıı Velıchko men Vıtalıı Pýhkalo qorǵaǵan bolatyn. Ókinishke qaraı ekeýi de shırek fınalǵa shyǵatyn úzdik 30 shańǵyshynyń qataryna ilige alǵan joq.
Atap aıtsaq, jarys qorytyndysy boıynsha Velıchko 62-orynǵa, al Pýhkalo 66-orynǵa ornalasty. Osylaısha qazaqstandyq sportshylar sprıntte irikteýden óte almady.
Jarystyń erejesine sáıkes, shırek fınalǵa joldama alý úshin sportshylar alǵashqy 30 shańǵyshynyń qataryna enýi kerek.
Esterińizge sala keteıik, osyǵan deıin áıelder arasynda ótken sprıntten irikteý saıysynda arýlarymyz úzdik 30 sportshynyń qataryna qosyla almady.
Aıta keteıik, Beıjiń qalasyndaǵy 2022 jylǵy qysqy Olımpıadada sporttyń jeti túrinen 109 medal jıyntyǵy sarapqa salynady. Aq Olımpıadada elimizdiń atynan 34 sportshy 85 joldama boıynsha el namysyn qorǵap jatyr.
