Beıjiń-2022: Shańǵyshylar komandalyq sprıntten fınalǵa shyǵa almady
NUR-SULTAN. QazAqparat – Beıjińdegi qysqy Olımpıada oıyndarynda shańǵy jarysynan áıelder arasyndaǵy komandalyq sprıntten jartylaı fınaldyq jarystar aıaqtaldy, dep habarlaıdy QazAqparat tilshisi.
Bul dodada Qazaqstan quramasy sapynda Nadejda Stepashkına men Ksenııa Shalygına synǵa tústi.
Alaıda ekeýi máre syzyǵyn 24:57,5 ýaqyt kórsetkishimen 10-shy bolyp kesip ótti. Osylaısha otandastarymyz fınalǵa óte almady.
Komandalyq sprıntten jartylaı fınalynda birinshi oryndy Reseı quramasy (23:00,47), ekinshi oryndy Fınlıandııa (23:00,82), al úzdik úshinshi orynǵa Shvetsııa (23:01,40) quramasy ıe boldy.
Aıta keteıik, atalǵan Aq Olımpıadada oıyndarynda elimizdiń namysyn 8 sport túrinen 34 sportshy qorǵap jatyr.
Olar - qysqy sport oıyndarynyń ishinde sporttyń shańǵy jarysy, frıstaıl-mogýl, shańǵy akrobatıkasy, taý shańǵysy, shańǵymen sekirý, bıatlon jáne short-trek túrlerinen synǵa túsýde.
Beıjiń Olımpıadasy 20 aqpanda máresine jetedi.
Foto: Turar Qazanǵapov, Qazaqstan UOK
