Beıjiń-2022 paralımpıadasynda Qazaqstan týyn kim alyp shyǵady

NUR-SULTAN. QazAqparat – Beıjińde ótetin paralımpıada oıyndarynda elimizdiń týyn ustap shyǵatyn parasportshynyń kim ekeni anyqtaldy, dep habarlaıdy QazAqparat QR Ulttyq paralımpıada komıtetiniń baspasóz qyzmetine silteme jasap.

Beıjiń-2022 paralımpıada oıyndarynyń ashylý saltanaty 4 naýryz kúni Nur-Sultan ýaqyty boıynsha saǵat 22.00-de bastalady.

Elimizdiń týyn para shańǵy sport túrinen álem kýboginiń qola júldegeri, halyqaralyq dárejedegi sport sheberi Erbol Hamıtov ustap shyǵady.

«Para shańǵydan ulttyq qurama komanda qazir Almaty oblysynda oqý-jattyǵýda. Daıyndyq karantın talaptaryna saı ótip jatyr. COVID-19 indetinen saqtaný sharalary barynsha qamtylǵan. Bizdiń maqsat - paralımpıada oıyndarynda jaqsy nátıje kórsetý. Sportshylardyń jaǵdaıy jaqsy, jarysqa daıyn jáne jeńiske umtylysy joǵary», - dedi ulttyq qurama komandanyń bas jattyqtyrýshysy Vasılıı Kolomıets.

Buǵan deıin Beıjiń-2022 paralımpıada oıyndaryna baratyn Qazaqstannyń qurama komandasynyń jasaqtalǵany týraly habarlaǵan edik.