Beıjiń-2022: Olımpıadanyń tórtinshi kúninde de elimizge medal buıyrmady
Búgin, ıaǵnı 8 aqpan kúni qazaqstandyq atletter sporttyń úsh túri boıynsha jarys jolyna shyqty. Eldegi taqymyn qysyp otyrǵan jankúıerler kógildir ekrannan kóz almaı, olımpıadashylarymyzdan júlde dámetkeli aptaǵa jaqyndap qaldy.
Búgin bizdiń sportshylar shańǵy jarysy, bıatlon jáne konkımen júgirýden synǵa tústi. Osy úsh sport túrinen toǵyz sportshymyz el namysyn qorǵady. Toǵyz sportshydan birde-bir júlde buıyrmady.
Aıtalyq, búgin eń áýeli shańǵydan áıelder arasyndaǵy sprıntten irikteý jarysy ótti. Onda Ksenııa Shalygına, Angelına Shýryga, Irına Bykova jáne Nadejda Stepashkına synǵa tústi.
Atalǵan sportshylar arasynan eń úzdik nátıjeni Nadejda Stepashkına kórsetti. Ol máre syzyǵyn 51-shi bolyp kesip ótti. Al ózge shańǵyshylarymyzdan Angelına Shýryga 60-oryn, Ksenııa Shalygına 67-oryn, Irına Bykova 68-orynmen irikteý synyn aıaqtady.
Bul básekede shırek fınalǵa shyǵý úshin aldyńǵy 30 shańǵyshynyń qataryna ótý kerek bolatyn. Bizdiń arýlarymyz ol mejege jete almady.
Odan keıin týra osy synnan erler arasyndaǵy jarys bastaldy. Onda el namysyn erlerden Evgenıı Velıchko men Vıtalıı Pýhkalo qorǵady. Ókinishke qaraı ekeýi de shırek fınalǵa shyǵatyn úzdik 30 shańǵyshynyń qataryna ilige alǵan joq.
Atap aıtsaq, jarys qorytyndysy boıynsha Velıchko 62-orynǵa, al Pýhkalo 66-orynǵa ornalasty. Osylaısha qazaqstandyq sportshylar sprıntte irikteýden óte almady.
Shańǵyshy qyz-jigitterimizden júlde buıyrmaǵan soń, bıatlonshy azamattarymyzdyń jolyna úmitpen qaradyq. Bul sport túrinen Qazaqstan namysyn Aleksandr Mýhın men Vladıslav Kıreev qorǵady.
Asa tartysty ótken dodada eki bıatlonshymyz da úzdikter qatarynan kórine alǵan joq. Kıreev (+3:41.8) 25-orynǵa ıe bolsa, Mýhın (+6:13.0) 52-shi orynǵa turaqtady.
Budan ári nazarymyz 1500 metrge konkımen júgirýden erler arasyndaǵy saıysqa aýdy. Bul synda el namysyn Dmıtrıı Morozov qorǵady. Alaıda ol jeńimpazdan 3.80 sekýndqa utylyp, Beıjiń Olımpıadasyn 18-shi orynmen aıaqtady.
Mine, búgingi ıaǵnı 8 aqpandaǵy Beıjiń Olımpıadasy qazaqstandyq sportshylar úshin osylaı aıaqtaldy.
