Beıjiń-2022: Morozova Olımpıada oıyndaryn 11-orynmen aıaqtady
NUR-SULTAN. QazAqparat - Búgin Beıjiń Olımpıadasy oıyndarynda konkımen júgirýden 1000 metrlik qashyqtyqtaǵy jeńimpazdar men júldegerler anyqtaldy, dep habarlaıdy QazAqparat.
Atalǵan synda Qazaqstan namysyn Nadejda Morozova men Ekaterına Aıdova qorǵady.
Jarys qorytyndysy boıynsha Nadejda Morozova 1000 metrdi 1:15,69- sekýndta baǵyndyryp, Olımpıada oıyndaryn 11-orynmen aıaqtady.
Al Ekaterına Aıdova atalǵan qashyqtyqty 1:16,70 ýaqyt kórsetkishimen júgirip ótip, jalpy esepte 19-orynnan kórindi.
Bul synda bas júldeni 1:13.19 ýaqyt kórsetkishimen japonııalyq Mıho Takagı jeńip aldy. Ol sondaı-aq Olımpıada rekordyn jańartty.
Ekinshi oryndy Nıderlandy quramasynyń ókili Djýtta Leerdam (1:13,83) qanjyǵasyna baılady. Al 1000 metrdi 1:14.61 ýaqyt kórsetkishimen júgirip ótken amerıkalyq Brıttanı Boýı qola júldeni enshiledi.
Aıta keteıik, atalǵan Aq Olımpıadada oıyndarynda elimizdiń namysyn 8 sport túrinen 34 sportshy qorǵap jatyr.
Olar - qysqy sport oıyndarynyń ishinde sporttyń shańǵy jarysy, frıstaıl-mogýl, shańǵy akrobatıkasy, taý shańǵysy, shańǵymen sekirý, bıatlon jáne short-trek túrlerinen synǵa túsýde.
Beıjiń Olımpıadasy 20 aqpanda máresine jetedi.
